نصر فتحي اللوزي يكتب: يا أم العجايب

يابلدنا ياام العجايب
ليه باشوف فيكى ياحبيبتى كل العجب
ناس نايمة على سراير وحراير
وغلابة نايمين من غير غطا تحت كبارى الخشب
ناس لابسه من المستورد صوف تقيل
ومساكين في عز البرد تحت هدومهم أوراق جرايد وكتب
ناس دفايانه قدام دفايات بالزيت ومشروبات للدفا
وغيرهم قاعد متلج قدام دخان القش والحطب
ناس بتاكل وبتشرب حاجات اساميها منعرفهاش
وناس على الصبحية بيستنوا اللى من المعزة اتحلب
ناس لمليارتنا سرقوها واستثمروها بره
وناس للفقر مش عارفاله أدنى سبب
ناس نايمين في العسل دخولهم بالملايين
وناس شقيانه من الفجر دخلهم اتسرق واتنهب
ناس النعيم اضلهم نسيوا شهور الصوم
وناس مع الخالق يبدأ صيامهم من رجب
ناس لما مصر تناديهم يبقوا صم بكم
وناس مخلصين بيكونوا على المعتدى نار ولهب
ناس بتهرب فلوسنا وتهرب معاها
وناس الواحد فيهم يعود لبلده بالخير وبحبه مهما اغترب
ناس عايشين بالكذب والطمع وقتل الابرياء
وناس قلوبهم بحب الله ومصر اكتر من المطر جوه السحب
ناس بالفساد عايشين فاسدين عن الحق سكرانين
وناس الحلال هدفهم والناس معادن همه دول الدهب
يابلدنا ياام العجايب كفاية على اولادك كدا
الكيل طفح علينا وعلى رؤوسنا بالهموم انقلب
يارب صابرين بحكمك علينا
بس ياريت ميكونش منك يارحمن علينا غضب
ومهما زادت آلامنا واستشهاد اولادنا راضيين
ياام العجايب حبنا ليكى احلى قدر علينا انكتب
آى والله
ياام العجايب ياللى لقلوبنا كلنا اطيب رطب