نشطاء مواقع التواصل الاجتماعي ينتفضون ضد إيقاف باسم مرسي.. أسماء: لك الله يا زمالك.. كمال: ربنا يخلصنا من ناظر العزبة.. محمد: يعني لما يبقى الرجل في مستواه وأعلى توقفه.. شاكر: ما تضربه بالنار أحسن

انتفض نشطاء مواقع التواصل الاجتماعي «فيس بوك» و«تويتر» بعد أن قرر مرتضى منصور رئيس الزمالك إيقاف اللاعب باسم مرسي بسبب حضوره حفل زفاف أحد أعضاء مجموعة «وايت نايتس» في طنطا، ورفض النشطاء قرار الإيقاف مؤكدين أن وجود "باسم" مهم في المرحلة القادمة، خاصة أن الزمالك مقبل على مباريات نصف النهائي الأفريقي.
ودشن نشطاء التواصل الاجتماعي هاشتاج «باسم مرسي» الذي احتل مركزًا متقدمًا في "ترِند" مصر بتويتر، لإثناء رئيس نادي الزمالك عن القرار.
ربنا معاك
قالت أسماء محمد: "لك الله يا زمالك طول ما مرتضى موجود.. الحاسم وشيكا ووايت ولاد التالتة يمين.. باسم مرسي"، وأضاف عبده كمال: "لا حول ولا قوة إلا بالله!.. ربنا معاك يا باسم.. ويرحمنا ويرحمكوا من ناظر العزبة.. باسم مرسي".
وعلق حسام مطر: "أوقف شيكابالا علشان رقص مع الجماهير.. أوقف باسم مرسي علشان رقص مع الجماهير.. أفسد صفقة يانيك زاكري‬ واللاعب انضم لصان داونز..".
ورد كيرولس بشرى: "ولا يهمك يا جرينتا، كمِّل على وضعك.. باسم مرسي"، وتابع محمد عتريس: "فيه ناس كده أول ما يحسوا إن الأضواء مش متسلطة عليهم يعملوا أي شو عشان يبانوا في الكاميرا، باسم واحد من الناس دي".
ماصدقنا عوته لمستواه
وقال محمد: "باسم مرسي؟ يعني لما يبقى الرجل في مستواه ويمكن أعلى كمان توقفه عشان حاجة عادية زي دي؟ مش قادر أسمي ده إيه"، وأضاف علاء منصور: "باسم مرسي مصدقنا إنه رجع لمستواه، ليه توقفه يا ضاضا"، وعلق عمرو صداوي: "شعب الزمالك معاك يا باسم.. باسم مرسي".
دعم وليس تدمير
وقالت هاجر طارق: "إنت مفروض تاخد قرارات تدعم الفريق مش تدمره!! بتخرج اكتر لاعب فايق عن تركيزه ليه؟!.. باسم مرسي"، وتابع يسري المصري: "حد يفهِّمه دا إننا ورانا نصف نهائي أفريقي ومحتاجين شيكا وباسم.. باسم مرسي.. يعني توقف الراجل لمجرد إنه راح وحضر فَرح واحد من كابوهات الوايت نايتس؟".
هيرجع في كلامه
وقال أحمد بوني: "ضاضا بوء وهيرجع في كلامه وسجل يا نصر لأنه هو اللي محتاجه.. باسم مرسي"، وأضاف حمادة السيد "باسم مرسي بعيدًا عن إني أهلاوي إحنا محتاجينك في المنتخب الفترة الجاية".
وعلق زومة بوزتف جيفت: "متخيل يا مان إن مرتضى عايز الزمالك يكسب أفريقيا وباع كهربا وأوقف شيكا وباسم، متخيل كميه البؤس؟! باسم مرسي".
وقال المكاوي سليمان: "يعني لما يبقى الولد في أعلى فورمة ليه.. تقوم موقفه عشان حاجه هبلة؟ مختل عقليا فعلًا.. باسم مرسي"
وتابع بيشو شاكر: "مرتضى منصور يقرر إيقاف باسم مرسي وعرضه للبيع ويطالب المنتخب بعدم ضمه بعد حضوره حفل زفاف أحد أعضاء ألتراس وايت نايتس، طب ما تضربه بالنار أحسن".