الرئيس فى حالة نفسية سيئة ولا بد من التدخل فورًا. المرشد يكلم نفسه: مشكلتك إن شخصيتك ضعيفة ومهزوز، بتخاف من أى حاجة وكل حاجة. وصل المرشد إلى القصر واتجه إلى المسجد. وجد مرسى "مقموص" واخد جنب فى المسجد. المرشد: ما لك يا دكتور؟! مرسى ينظر إلى المرشد وعيناه دامعة قائلا: "لأ مش ده اللى اتفقنا عليه". فضليتك قلت بالفم المليان: "إنى أراك ابن الخطاب". المرشد: وده حقيقى إنى "أراك ابن الخطاب". مرسى: لا ابن الخطاب ولا ابن العاص، الشعب جعلنى أبو ........... المرشد بعد أن تغيّرت ملامح وجهه، صرخ: دكتور إنى آمرك بالتحمل. مرسى: ما انا متحمل أكتر من "الجمال"، متحمل 90مليون "شتمة" ودعوة و"تريقة" كل ساعة، هو أنا إيه؟ مش بنى آدم؟!! على فكرة الشعب زوّدها قوى قوى "وانا زعلان منه.. ها"، و"مقموص منه.. ها". المرشد: لا تنسَ إن "ابن الخطاب" لم يكن فى أيامه "البرادعى" ولا "عمرو موسى" ولا "صباحى" ولا "الألتراس" ولا "جبهة الإنقاذ". مرسى: لأ.. كان فيه يهود ومرتدين، ده انا اللى حظى وحش، أنا أخدت وش القفص "وطلع بايظ". المرشد: لأ واضح إن الشيطان تملّك منك، استعيذ بالله منه. مرسى يجرى ناحية المرشد: أيوة الشيطان.. كله كوم والشيطان كوم تانى.. يا مؤمن ده وانا بصلى يقوللى "إلحق فية مظاهرات وقتلى ومصابين والبلد ولعت" و"يبوّظ صلاتى" حتى الشيطان بيضحك علىّ. المرشد: لأنه متحالف مع الإعلام والبرادعى وجبهة الإنقاذ، يبقى كدة إحنا صح. مرسى: لأ أنا عايز أخطب للشعب وأقوله: أنا خلاص "زهقت" مالها الجامعة!! زى الفل. المرشد وينفعل: "يا خسارة.. إحنا تحمّلنا 70 سنة من "عبد الناصر" إلى "مبارك" ودخلنا السجون، وكنا "محظورين"، وبعد ما ربنا كرمنا تقولى "زهقت"؟ إنت بتهرج؟ ده اسمه شغل "عيال"!! مرسى مترددًا: والله غصب عنى، أنا فى وش المدفع وانتم بعيد. المرشد: يبقى مفيش غير حل واحد. مرسى: إلحقنى بيه أبوس إيديك. الكبير: نكلم الشاطر ويشوف لينا حل. مرسى بإيديه: لأ.. لأ.. بلاش "الشاطر".. بلاش، هو الأيام دى عصبى قوى، ومش ناقص. المرشد: خلاص، تسمع الكلام وتنفذه، إحنا بنعمل لمصلحة الجماعة. مرسى بعد أن تغيرت ملامح "وشّه": خلاص. المرشد: اسمع، حلمنا لازم نحققه "الخلافة الإسلامية"، الجماعة لن تسمح لك أو لغيرك أن يضيع الحلم "فهمت". مرسى: "والصحافة، والفضائيات" وكله كوم وبتوع "الكاركاتير" كوم تانى، بيرسمونى فى أشكال وحشة قوى، أنا فى بعض الأحيان بخاف من نفسى، كتّر خير "العيال" اللى بتشوف الرسومات دى. المرشد: قوم صلى ركعتين "لله" حتى ينصرك على الأعداء والمعارضة والألتراس وبورسعيد، وباقى المحافظات وباقى الوطن العربى. مرسى: الشعب كله بقى أعداء لينا، هو احنا "وحشين" قوى للدرجة دى؟!! المرشد: وليه مايكونش هما اللى "وحشين". مرسى: خلاص نسيبهم ومانضعيش وقتنا معاهم. المرشد: هاها.. على جثتنا.. الشعب ده "غنيمة "للإخوان". مرسى: طيب ينفع آخد أجازة كام يوم أرتاح شوية؟!! المرشد "بنرفزة": "بطّل شُغل "العيال" بتاعك ده، إنت ريس.. "عيب عليك". فترة صمت: ينظر كل منهما للآخر. المرشد: سامحنى. مرسى: إنت صاحب الفضلية، ولك "السمع والطاعة". المرشد: شاطر يا مرسى، الله يفتح عليك. مرسى: ومن النهاردة.. مفيش شعب، "بلا شعب بلا بطيخ" ها ها ها أنا الشعب. المرشد: هايل.. برافو عليك، كده تبقى "ابن الخطاب" وخليفة المسلمين بجد. مرسى باكيا: مش عارف ليه كل ما اسمع كلمة "ابن الخطاب" أحس إنك بتضحك علىّ. المرشد ضاحكا: إنت طيب يا دكتور، والبلد دى عايزة واحد زى "الشاطر"، كان خلى الشعب كله ينام من العصر. مرسى: ما انا بسمع الكلام، وكل اللى بيقوله "الشاطر" والجماعة وبنفّذه، ومن الآخر انت من النهاردة هتشوف واحد تانى خالص. المرشد: أيوة كدة، يسلم أبو "العياط" اللى من النهاردة هيبطل "عياط". مرسى مبتسمًا: الله يخليك "يا كبيرنا" أنا عايز إية أكتر من رضاكم!! المرشد: صبرًا والأيام بينا وبين هذا الشعب يا احنا يا ......... مرسى: أنا كنت مقموص من الشعب، لكن خلاص، بعد كلامك الحلو ده يروح الشعب يشرب من ................................
