"كنباوى" يَلْمَح "كنباوية" تسير فى الشقة تحدث نفسها فيستوقفها متسائلا: إيه يا"كنباوية"، هى وصلت بيكى إنك تكلمى نفسك؟ "كنباوية": دى حاجة تخلى الأخرس ينطق ويخرج عن شعوره. "كنباوى": إيه بس اللى حصل تانى؟ "كنباوية": سكتناله دخل بحماره!! "كنباوى": هو مين ده اللى سكتناله؟ قصدك على مين؟ "كنباوية": هو فيه غيره، مرسى بارم ديله!! "كنباوى": عمل إيه تانى؟ "كنباوية": عمله اسود ومنيّل، الراجل وشّه بقى مكشوف وبقى يعمل الغلط عينى عينك، ولا حد هامّه، دى عمرها ماحصلت فى التاريخ، الراجل أخد أول قرار من نوعه فى تاريخ رؤساء الجمهوريات وفى تاريخ مصر، الراجل خد قرار جمهورى برد اعتبار خيرت الشاطر الدراع اليمين والنائب الأول لمرشد الجماعة من الجناية اللى حالت بينه وبين ترشحه للمنافسة على منصب رئيس الجمهورية فى الانتخابات الرئاسية الأخيرة، عارف ده معناه إيه يا"كنباوى"؟ "كنباوى": لأ ما اعرفش نوّرينى. "كنباوية": معناه إن مرسى برّأ ذمة الشاطر، وصحيفة الحالة الجنائية الخاصة بالشاطر مبقاش فيها أى سوابق جنائية، ومن مزاولة العمل السياسى، ومن إنه يتقلد أى مناصب سياسية فى الدولة زى أى واحد عادى. "كنباوى": وده غلط يا"كنباوية"؟ "كنباوية": طبعًا غلط، أول هام المعروف والمقرر إن تختص النيابة العامة ومحكمة الاستئناف بنظر طلبات رد الاعتبار مش رئيس الجمهورية، لكن كده هو خلاها خل، ماهو ماحدش مالى عينه، وبعدين ده مخطط علشان يعينه فى تشكيل الحكومة الجديد رئيس وزراء، وبعد كده حسب دستور الإخوان يبقى هو الرئيس فى حال غياب مرسى. "كنباوى": يا ولاد اللاعيبة؟ همه حسبينها كده؟!! "كنباوية": وتقولى بتكلمى نفسك ليه؟ "كنباوى": لأ كده ليكى ألف حق تكلمى نفسك، دول فجروا، بس قوليلى، هو كانت تهمة الشاطر إيه؟ "كنباوية": الشاطر كان متهم فى قضيتين أيام حسنى، قضية سنة 1995، وهى قضية إحياء تنظيم جماعة الإخوان المسلمين، واتنشّ فيها حكم 5 سنين، لكن فى اتفاقية المجلس العسكرى بقيادة طنطاوى مع الإخوان المجلس العسكرى قرر العفو عن الشاطر ورد اعتباره فيها. "كنباوى": والقضية التانية كانت إيه؟ "كنباوية": اصبر عليّا ما انا جيالك فى الكلام، القضية التانية كانت سنة 2007، واتحبس فيها 5 سنين، القضية دى اتعرفت أيامها إعلاميًّا باسم قضية تنظيم ميليشيات الأزهر وأدانوه فيها، وعلى خلفيتها بتهمة غسيل الأموال، وفضل محبوس على ذمة القضية دى لحد ما أفرج عنه صحيًّا بعد ثورة 25 يناير، ولم يتم رد اعتباره فيها، وده اللى ماخلاهوش يقدر يترشح فى الانتخابات الرئاسية اللى فاتت، واترشح بدل منه مرسى نايبتنا التقيلة، والإخوان بيقولوا إن النظام السابق كان ظالمه ومتجنى عليه. "كنباوى": ما أظنش إنه كان مظلوم، أمال جاب فلوسه دى كلها منين؟ "كنباوية": أديك انت قولت، جاب فلوسه دى كلها منين. وبعد ده كله فاضل إيه تانى؟ دول راسمينها من الأول يا"كنباوى"، دول ماحدش يقدّرهم، سيبنا من ولاد الهرمة دول وتعالى امسك معايا الكرشة علشان ألحق انضفها واعمل لكم الأكل زمانك جعت. "كنباوى": بينى وبينك ميّت من الجوع. "كنباوية": خلاص افتح علبة تونة وكلها؛ لأن الكرشه قدامها 3 ساعات، مش معقول تقعدهم بالجوع. "كنباوى": حاضر، أنا فعلا حعمل كده؛ لأنى واقع ومش قادر استحمل الجوع. "كنباوية": بالهنا والشفا يا"كنباوى"، كل الأول وبعدين تعالى امسك معايا الكرشة. "كنباوى": من عنيا يا غالية.
