طرحت إحدى صفحات موقع التواصل الإجتماعى "فيس بوك" سؤالا حول رد فعل مستخدمي الموقع أثناء انتظارهم نتيجة الثانوية العامة. «فضلت متنحة يومين» قالت إسراء: «كنت قاعدة على الكنبة اللى بتشيل همي دايما ومتنحة فضلت كده اليومين اللى قبل النتيجة لحد ما نزل أسماء أوئل الجمهورية وحسيت أن الخطر بيقترب فاتصلت بصحابي عشان أأمن مكان بعد ما أسيب البيت أو اتطرد يعني وفضلت بعدها بيوم أحاول أجبها معرفتش لحد ما زهقت وجبت أخري ونمت وصحيت على صحبتي وهي اللى جبتهالى، وبرغم كل التعب والتوتر وكل حاجة وحشة حصلت في السنة عموما وفي اليومين اللى قبل النتيجة فرحت لأن مجموعي جاب الكلية اللى كان نفسي فيها، ومدخلتهاش». شريط منوم وأضافت شيماء: «أخدت شريط برشام منوم ومحصليش حاجة ونمت ساعة وصحيت قردة فاشلة حتى في الانتحار»، وقالت ساندي: «كانوا أوحش يومين، سنة تانية النتيجة ظهرت وأنا في المصيف وفضلت أعيط على البحر سنة تالتة ظهرت قبل الفطار ومحدش فطر في البيت بسببي، الحمد الله على كل حاجة». نجحت في ملحق وأضاف مصطفى: «لا أنا الحقيقة كنت شايل رياضة 2 ملحق يعني، وروحت امتحنتها ونجحت وأمي عملت عزومة من كتر الفرحة وكانت ليلة وأخوالي جم باركولي ونقطوني عقبال عندكم». وقال عبدالرحمن: «معملتش حاجة، كان يوم حلو أوى أوى بصراحة حاجة نيله، أكون صايم ولسه هشرب أهو خلاص واحد يقولى النتيجة ظهرت روحت جبتها كانت زي الفل الحمدلله، ودخلنا هندسة وهيصنا». أمى لبست إسود وأضاف مينا: "أمى لبست عليا أسود وأبويا طالبني بحق فلوس الدروس"، وقالت يسرا: "فضلت مستنياها اليوم كله جات على الفطار مكنتش لسه فطرت فضلت أحاول أفتح لحد معرفت إنى جبت 84% وشايلة إحصا واقتصاد فضلت أعيط أعيط وقرايبي يزغرطوا، عيلة على وضعها أصلا وبقيت اليوم مكلتش غير لما أطمن إنى مش لوحدى والصحاب كلها كنا شايلين سوا». 100 جنيه للفسحة وأضافت منار: "كنت باكل حمام لقيت أخويا بيقولي النتيجة طلعت قولتله إستنى هخلص اللى معايا وأجيلك، أول مارحتله فضلت واقفة بعيد وعمالة أعيط لحد بعد النتيجة بيوم كدا وجبت 92% وبرضوا دخلت خاص يلا الحمد الله". وقال بهاء: "بص يابرنس أنا كنت بلعب كونكر وكان في حرب شغالة، وأمى كل دقتيتن تقولي شوف النتيجة وأنا أقلها لما الحرب تخلص بس ولما خلصت الحرب فتحت الموقع وجبتها كانت 97.5% طلعتلهم في الصالة قلتلهم أبويا فرح وامى مفرحتش قوى، ورحت فتحت كونكر تاني وكملت لعب ولا كأن في حاجة، وحاليا في صيدلة وعندي برود اكتر من الأول ربنا يديمها نعمة». وأضاف محمود: "قولت لأبويا انا جبت 68% قالي مبروك وإدانى 100 جنيه وقالى انزل اتفسح".
