كعادتى، كنت أتابع أحد برامج ال"توك شو" وسط أبنائى المفاعيص، واستضاف المذيع قيادى "إخوانى" لتحليل الوضع السياسى الراهن الذى تمر به البلد.. وعندما قال الضيف "مصر الآن فى مفترق طرق".. هَبّ المفعوص قائلا: "غلط.. تحليل غلط". - أومال إيه الصح يا لِمِض؟ - "مثر" دلوقتى فى مفترق "الأبلجة" و"اللجلجة".. - أنت بتقول ألغاز..؟! - لا ألغاز ولا غاز يا بابا.. أنا قثدى أقول "الحق أبلج والباطل لجلج".. - أبلج ولجلج..!! عليا النعمة شكلك مش مظبوط.. وأكيد بتقول تعاويذ زى الدجالين والمشعوذين والنصابين وبتوع التلات ورقات اللى بيطلعوا فى الموالد.. - يا نهار أبيض يا حج، أنت بتغلط فى الريث.. - الريس؟! ريس مين يابو نص لسان، اللى لسه بتستخدم ألفاظ من العصر الجاهلى.. - الريث "مرثى" هو اللى قال الكلام ده فى خطابه قدام أنصاره عند الاتحادية، بمناثبة الإعلان الدثتورى التالت.. - يا نهار مش فايت.. الرئيس قال الكلام ده.. إزاى.. وعلى أى أساس.. هو عايش معانا ولا عايش فى عصر ما قبل الإسلام.. - لا يا بابا.. عايش معانا دلوقتى.. - عايش وسطينا ومش عارف إن نص المصريين مبيعرفوش الإراية ولا الكتابة.. والنص التانى فيهم ناس يا دوب بتعرف تفكر..! - عارف يا بابا.. وأكيد بيقول الكلام الغامض ده عشان يبين للناث إنه فاهم وواعى وقارى ومطلع، ومتأكد كمان إن مفيش حد هيثأله إيه معنى الكلام ده. - فعلا يا مفعوص.. المصيبة إن أنصار الريس عند الاتحادية هللوا وكبروا وكأنهم فاهمين كلامه، كلمة كلمة، وحرف حرف.. رغم إنهم نازلين لمهمة واحدة هى التصفيق والتهليل والتطبيل والتأييد للقرارات، حتى ولو كانت خاطئة.. وترديد كلامه حتى ولو كان غير مفهوم.. لأنهم باختصار شايلين مخهم وديعة فى مكتب الإرشاد.. ومش ناويين يستردوه تانى..! - متثخنش قوى يا بابا.. ومتنثاش إنهم دلوقتى بيحكمونا.. والكلمة الأولى والأخيرة ليهم.. - حكم النيلة والسواد.. وعلى رأى المثل: "وافق شَنّ طبقة"..!! - يعنى إيه يا بابا؟!! - هتلاقى الترجمة بتاعتها فى قاموس "مرسى- عربى، عربى- مرسى"..!
