كلنا وإحنا صغيرين بنبقى عجينة سهلة التشكيل سهل إن أي حد ييجي ويسيب بصمته فينا، لذلك بنلاقي الطفل مجرد ما حد يقوله أي حاجة سلبية أو إيجابية ممكن فعلًا تثبت جواه وفي نفسيته. زمان في طفل اتطرد من المدرسة وسلموه جواب قالوله إديه لوالدتك وقولها إنك مستحيل تدخل المدرسة تاني مهما حاولت، المهم الولد روح ومعاه الجواب وإداه لمامته وقرأته وبعدين حبت تقرأ عليه الجواب فقالت له المدرسة بتقول إن قدراتك كبيرة والمدرسة معندهاش القدرة الكافية علشان تعرف تتعامل معاك فسيبك من المدرسة وتعالي نشوف إيه اللي ممكن نعمله سوا. قعدت تفكر كتير وصلت لفكرة حلوة جدًا قررت أنها هي اللي هتعلمه في البيت وفي نفس الوقت هتشتري الجرايد كل يوم وتخليه يبيعها وبالفعل كل يوم كانت بتشتريله كام جورنال على كام مجلة وتخليه ينزل علشان يبيعهم ولما يرجع كانت بتقعد تعلمه في حاجات كتير جدًا سواء علوم أو جغرافيا أو تاريخ ؛ كانت له مدرسة بمعنى أدق. مرت الأيام والولد ده يحب أنه يقرأ في الجرايد والمجلات اللي معاه فيتعلم أكتر ويتعلق بالعلوم أكتر وأكتر لحد ما في يوم فكر في فكرة مجنونة وهي حب يخلي فيه مصدر للضوء لا يقل مع الوقت زي الشمس أو الشمعة وفضل يجرب ويحارب لحد ما فعلًا وصل للمصباح الكهربي. الولد ده يبقى توماس أديسون اللي لو كانت فعلًا مامته قالتله على محتوى الجواب اللي جالها زمان بيقولها ابنك غبي ومينفعش في تعليم أو أي حاجة كان فعلًا ممكن يبقى كده. كل واحد فينا أكيد ضحية لأي برمجة اتعرضلها زمان ده بالعكس أنت كمان البرمجة دي بتأثر على مستقبلك كمان، مش كفاية شوهت الماضي وبتشوه في الحاضر، لا ممكن تكمل معاك لقدام، بمعنى لما حد بيكون بيدخن وبيحاول يبطل لازم يكون فيه حد فاعل خير يقوله أنت فاكر أنك تقدر تبطلها ؟؟ كان غيرك أشطر دي محدش يقدر يبطلها دي كانسر طالما اتمكن منك مستحيل يسيبك. مع أن كان فيه حاجات كتير كان بيتقال عليها مستحيل لكن دلوقتي مبتقش مستحيل زمان لما كان عباس ابن فرناس بيحاول أنه يطير كان دايمًا بيتقاله مستحيل هتفشل ومستحيل الإنسان يطير أصلًا وأهو دلوقتي بقى فيه طيارات بنطير بيها لكل مكان في العالم. زمان كانوا سألوا واحد ناجح جدًا أنت إزاي قدرت توصل لكل النجاح ده ؟؟ قالهم ببساطة حذفت كلمة impossible من قاموسي فقدرت أحقق كل اللي أنا عاوزه وركنت على جنب كل الكلام السلبي اللي اتقالي زمان. لو سبت نفسك لأي برمجة سابقة أو كلام سلبي يتقالك أو فكرة بأن اللي بتفكر فيه ده مستحيل أضمنلك مكان كويس ضمن اللي حققوا لا شيء في حياتهم.
