شوفوا بقى يا أهل مصر ع الصبح.. أنا حقى مش هيروح هدر.. إزاى يعنى آخد صفر في لجنة وآخد 1000 صوت في لجنة تانية.. طب دا عنى أنا وأنا كدا كدا داخل إعادة وميهمنيش. تقولوا إيه بقى على مرشح من الأقصر جايب صفر في كل اللجان.. هو دا يعنى كان كسلان يصوت لنفسه؟!.. طب مصعبش على أمه اللى خلفته وراحت صوتت عاللى جابوه؟!.. طب مراته راحت فين يعنى؟! هو مالوش ناس الواكل ناسه ده ولا إيه؟! دى انتخابات مزورة ولازم تتعاد.. طب يعني إزاى قائمة مصر بلدى تجيب صفر في 3 لجان؟! طب سيبكم من مصر بلدى وخليكم في قائمة حزب النور اللى جابت صفر في أكتر من لجنة.. ليه مفيش في البلد اللى فيها اللجنة دى واحد شيخ يوحد ربنا يعنى ولا إيه.. أمال الدواعش اللى في البلد راحوا فين ولا إحنا كان بينضحك علينا يا ولاد الحلال؟! خلاصة الكلام ودا بيان رسمى عن مرشحكم البااارلمنجى لازم الانتخابات تتعاد لأنها مزورة. مع تحياتى: أخوكم "نزيه صندوق عبد المتعال الناخب" الشهير بالبااارلمنجى مرشح برلمان 2015 المزور رمز الغربال رقم صفر!
