إلى محبى التنمية والاستقرار، أحب أهنيكم من قلبى وأقول لكم مبروك علينا الإعدام يا رجالة، قصدى "الاستقرار" يا جماعة، شوفتوا أول يوم بعد الإستفتاء ب "نعم" على الدستور، إيه اللى حصل ؟ تراجع مؤشر البورصة، لتخسر 4.8 مليار جنيه، والجنيه ينخفض أمام الدولار ليصبح الدولار ب6.21 جنيه، وإلغاء بعض السلع من مقررات التموين لارتفاع سعرها، وأخيراً إعلان الحكومة الألمانية تأجيلها لخطة إعفاء مصر من الديون والمقدرة بنحو 240 مليون يورو، أظن مفيش بعد كده استقرار يا جماعة ولا إيه؟! لاقت نتيجة الاستفتاء والتى جاءت ب "نعم" وبنسبة 68 % كما أعلنت جماعة الإخوان المسلمين، ترحيباً واسعاً من شباب الإخوان والتيار السلفى، الذين قالوا إن الدستور سيجعل الاستقرار يعم البلاد وسيحقق التنمية، وعلى العكس تماماً جاءت تعليقات شباب "فيس بوك" الساخرة حول مشروع النهضة وحلم الاستقرار الذى شبهوه بأنه "عيل تايه ومش لاقيينه"، "فيتو كافيه" رصدت تعليقات الشباب: أسماء شريف: عيل تاه يا ولاد الحلال اسمه "استقرار" حد شافه؟ محمد فاروق: "نهضة" أنا مش شايف أيتوها نهضة يا جدعان. نور عبدالله : يا جماعة سبب الانهيار الاقتصادى إن مصر معمولها عمل. وليد على: السادات يتحدث: طب كويس إنى معملتلكمش استفتاء أسألكم فيه، "لا" للحرب ولا "نعم" للاستقرار. تامر مجدى: "رئيس البرلمان الأوروبى يدعو لوقف التعاون الاقتصادى مع مصر بسبب سوء الإدارة السياسية فى مصر" إلى محبى الاستقرار.. إلى كل من قال "نعم" للدستور أحب أسألهم فين الاستقرار ده ولا انتم غاويين تحلموا؟ حسن سالم: البورصة تخسر 4.8 مليار جنيه ومؤشرها يتراجع 1.49% فى أولى جلسات الأسبوع كلمنى أكثر عن الاستقرار إديهم كمان استقرار يمكن يتوبوا. كريم نور: يا بيه ما هو لو كل واحد ضد مرسى نزل الشارع واعتصم، الناس كلها هتباااات فى الشارع. آيات أبوالمجد: يا مستنى نهضة من 6 شهور... يا مستنى استقرار بعد الدستور. خالد السعيد: نتيجة الاستفتاء 6 مليون علمانى وكافر هيدخلوا النار، و10 مليون مؤمن هيدخلوا الجنة، و74 مليون مالهمش ملة هيقعدوا فى الشارع! محمد عمر: بيقولوا فيه استقرار حصل فى مصر من ساعتين، حد فيكوا حس بيه؟ محمود محسن: واحد خايف قوى من فكرة إنه تقوم حرب أهلية فى البلد بعد الاستفتاء لقيته النهاردة الصبح حاطط كوم برسيم قدام العمارة ومستخبى ورا الباب ، فبسأله بتعمل إيه يا عم رضا؟ قاللى عامل كمين للإخوان. ماجد نبيل: جلست والخوف بعينيها تتأمل دستورى المسلوق، قالت يا ولدى لا تحزن فالتزوير عليك هو المكتوب. شيماء الرفاعى: فى ناس بتقول إنه فى استفتاء وحصل فى تزوير "أبسلوتلى" ده كان فى تزوير وحصل فيه استفتاء. حليم كمال: اتضح إن كلمة مرسى كلمة إنجليزية فى الأساس، وهى تتكون من جزءين "مور" و"سى" يعني ياما هنشوف. هيثم حسين: تحب تقول إيه لعمو "استقرار"؟ أحب أقول له فينك يا غالى واحشنا من زمان. محمد مصطفى : ما تلومشي على إلي عايز يعيش بكرامة، فاهم يا بتاع الإستقرار ؟. محمد رمضان: إجراءات تصويت المواطن المنوفى: 1 يشوف إيه الحاجة اللى عايزينها الثوار. 2 يختار عكسها.
