شد المعلم فتوح المفتح أنفاسه ومن السطل هز رأسه، فقال له الملعم زينهم: إيه يا معلم هو الصنف عليك شديد؟ وضحك المعلم فتلة وقال: عيب يا معلم دا فتوح دا حديد، فقال فتوح لا بقى احنا جامدين، فرد زينهم أمال مالك يا معلم خدت نفسين ونمت كأنك من المحافظين.. فتوح: آه يا معلم جيت على الوجيعة دا شغلانة المحافظين دي حاجة فظيعة، الواحد من دول يطلع بتصريح ويخش ينام، وتدور على اللي عمله في الشارع تلاقيه أوهام، ما هي إنجازاتهم كلها كلام في كلام، والمهم صورته تزين الجرانين.. فتلة: يا عم احنا حرانين.. دي سيرة تفتحها تغم نفسنا، من كتر قولة آه من شغل المحافظين اندبح حسنا، ولازم تفهم الفولة أنت مش في سنة أولى، أديني تصريح أديك تأبيدة تدخل شاب تطلع عجوز أو تدخل عجوز تطلع على الترب، دي تصاريح متعبية في علب.. زينهم: أيوة أنجزنا وأوشكنا وخططنا وتظبطلك ميدان وشارع وتسيب بقية المحافظة حفر ومطالع، دا شغل على كبير فتلة: هأو هأو دول فاكرنا حمير.. فتوح: المحافظ بيقولك ما يقدر على القدرة إلا ربنا، يعني هو كان ذنبنا، إن ظبطنالكم شارع وميدان ما هو دول اللي هميشي فيهم الكبير، لكن بقية الحواري والشوارع يدوب ساكن فيهم غلبان وغفير، أما بقى لو ساكن فيهم وزير، كنت بعت اللوادر وعملت شغل عالي فخفخينا وصلحت عمدان الكهربا المكسورة عشان خاطر عيون أفندينا.. فتلة: يعني ما الآخر إنجازتهم على الورق.. زينهم: آه ولو مش عاجبك اتفلق.. فتوح: يا أخي مش يراعوا إن مصر بتفرح فتلة: آه والفرح على الأرصفة أكوام أكوام والحفر رزم رزم ومية الصرف بتروي الشوارع براحة.. زينهم: دا شغل تناحة.. فتوح: والمهم الصورة تزين الجرانين وكام تصريح مليان تفانين، وبكدا عمرك ما تخرج مع الخارجين ومش بعيد تعمر في الكرسي ليوم الدين.. فقال زينهم يا أخي فضك بقى من دي سيرة، دي سيرة تقطع من البيت الخميرة، وسبوني في اللي أنا فيه وكفياني حيرة.. فقال فتلة: كفى الله الشر عليك من الحيرة اظبطلك تاني أجدع تعميرة. فتوح: مالك يا معلم زينهم محتار دا الصنف عالي أهو ومشعلل نار. زينهم: الواد في البيت بعد ما خلص هندسة، أحواله بقت مش كويسة، وكعوبه حفيت من اللف على شغل، وأنا أقوله بكره تفرج وبطل حقد على الحكومة وغل. فتلة: في كل بيت هتلاقي أنبوبة منفسة عاطل بالشهادة وأموره مدحوسة خريج علوم أو حتى هندسة ولو الحكومة نفضت دماغها العواقب مش كويسة. فتوح: طب ما الكبير حلها بس ابنك بيتلكك، هو يروح يشتري توك توك، ويعلق عليه يافطة متبصليش بعين ردية بص للي اندفع فيا، ويعلق شهادته على ضهر التوك توك، أصلها بقت مش فارقة بين اللي ناجح على الحركروك وبين الشهادة العالية. زينهم: البطالة بقت مشكلة، والأنبوبة المنفسة بكرة هتبقى قنبلة ومش هينفع معاها شغل التصريحات والتعلب فات فات وفي ديله سبع لفات.. فتلة: كل يوم بنخرج من الجامعات ونرمي، وكل مسئول بيقول مش مشكلتي ويجري.. فتوح: آه وادحرج واجري يا رمان وتعالى على حجري ويا اللي على الترعة حود على المالح دي حكومة مسكنات ويا ريته فالح.. وهنا صرخ فتلة وقال: بس بقى يا عم أنت وهو كفاية هزار، وطفوا بقى النار، دي الدماغ بقت ملحوسة، وكلامنا كله هلوسة.
