أبو مصطفى : والله يا ناس أنا احترت من الجيرة السودة بتاعتنا.. انا ماصدقت اروح يوم بدرى واقعد جنب ام العيال وكانت معشمانى بطبق بصارة من اللى قلبك يحبه ..وقامت الولية شحتت لنا فحل بصل من ام اسكندر جارتنا.. ويدوبك هنقول بسم الله..وسمعنا صوات وصريخ وولولة وجيرانا بيجروا شمال ويمين ..يارب استرها هوالمخلوع والعادلى رجعوا تانى ؟ماهم مكارين ممكن يرجعوا تانى واحنا نايمين ! اتارى ايه الموضوع ؟ الموضوع ان الولية ام محمود جارتنا جوزها بقا له شهر مبطل السجاير..وقال ايه.. ربى دقنه ولبس جلابية ..وقال ايه كمان بيصلى الفجر حاضر. ابو مصطفى:وفيها ايه يا ام محمود إن جوزك ربنا هداه ؟ ام محمود :هداه ..مين ياخويا ..ده طول عمره واطى وعينه زايغة .. ابن فكيهة الدلالة ..الراجل بدل مايدخل عليا بكيس فاكهة يفرحنى انا والعيال ..ألاقيه دخل وفى ايده .. قال ايه .. جارية مشتريها من سوق الجوارى ..يعنى بطل يشترى سجاير ويشترى بدالها فياجرا ..وقال ايه.. الراجل بيقولى دى مش هتغرمنا حاجة ..دى خدامة بلقمتها ..وكمان مش هنجيب لها هدوم ..يعنى الولية هتقعد ملط فى البيت..شوف ياخويا الراجل الناقص ابو عين فارغة..ما هو طول عمره واطى. ابومصطفى : اصبرى بس يا ام محمود وبلاش تعددى وتولولى وخلينا نعرف إيه الحكاية من الراجل؟ ام محمود : راجل مين يا اخويا .. دى الرجالة ماتت من زمان .. مش كده يا ام اسكندر؟ ام اسكندر: معلهش يا اختى .. الحيطان ياما بتدارى.. وكل واحد ليه نبى يصلى عليه. ابو مصطفى : خلينا نسمع الحكاية من الراجل ..إيه يا ابو محمود..انت طول عمرك عارف ربنا .. مش حرام عليك تجيب واحدة لامؤاخدة وتدخل بيها على ام عيالك ؟ ابو محمود : استغفر الله العظيم ..ده كلام تقولوه..هو انتوا مش عايشين فى الدنيا دى واللا ايه ..الاخوان والسلفيين بقا لهم فى الحكم ييجى سنة دلوقتى..وربنا كرمنا بيهم..وعملوا لنا مشروع للنهضة.. سوق كبير للجوارى.. وممكن الواحد يشترى له جارية وإلا اتنين..وهناك هتلاقى البيضا والسودة وعلى كل لون.. انت تعرف يا ابو مصطفى انا طار من ايدى حتة جارية كلها هيفاء وهبى ..بس اه يا نارى على قلة الفلوس .. أهى كانت حاجة كده تنور البيت ..ولهفها واحد دفع فيها خمسة دنانير زيادة .. أبو مصطفى : بتتكلم جد.. والنبى يا ابو محمود .. طب هما بياخدوا فلوس على الفرجة ؟ أبو محمود :لا ..ده انت تتفرج وتقلب براحتك.. وعايز تشترى.. مش عايز.. اديك هنيت ايدك وخلاص.. وهو ده مشروع النهضة اللى الخليفة اتكلم عليه.. مش واحد متجوز بقا له تلاتين سنة..ومراته زي نبوت الغفير .. أبو مصطفى : خلاص يا ابو محمود.. اسكت وخليها فى سرك .. انا هافهم الحريم ان الموضوع غير اللى فى دماغهم خالص .. وخرجت يا اخويا اكلم الحريم لقيتهم لابسين اسود.. وبيصبروا بعض .. وسمعتهم بيقولوا البلد فى ثورة .. هنعقعد إحنا الحريم نتشاور مع بعض ونشوف ها نقرر إيه .. وبينى وبينكم انا خفت ع الراجل ابو محمود .. الست مراته شرانية.. يعنى ممكن تعبيه فى اكياس .. وإحنا فى زمن مش فيه حكومة ولا شرطة.. يعنى اللى معاه سنجة او مطوة هو اللى يحكم ويأمر ..قلت فى بالى يا واد يا ابو مصطفى اتصنت عليهم من ورا الباب .. ماهى مراتك قاعدة معاهم ووسطيهم .. ام مصطفى: شوفى يا ام اسكندر وانتى يا ام مينا وانتى يا ام محمود.. احنا حريم زى بعض .. ولوما اتفقناش مع بعض يا اختى.. بكره يبيعونا فى سوق الجوارى..احنا لازم ولابد وحكما نعمل جمعية .. أمال ايه..وانا ههقبضها الاول واروح على سوق العبيد واجيب من هناك عبد يكون زى الوحش .. يكون جتة .. طول بعرض .. يعنى بالبلدى يكون واد فلقة باب.. ونشوف كيد النسا ولا كيد الاخوان ..وكلمة فى سركم..لو الواحدة فيكم اتزنقت فى الغسيل ولا فى طبيخ تبعتلى .. ابعتهلها العبد يساعدها .. واهو كله بثوابه . ام اسكندر: .لا.يا ام محمود ..خديها نصيحة من اختك ام اسكندر ..احنا نشترى تلاتة عبيد يكونوا زى الحيطة .. فيهم طول وعرض.. نخلى واحد منهم لخدمة البيت.. والاثنين التانيين نعمل بيهم ايه..اوعى مخك يروح لبعيد..إحنا بتوع ربنا.. صحيح ياختى الواحدة فينا لما بتغلط بتروح الكنيسة وتعترف لابونا ..وتخرج من عنده زى البافتة البيضا.. ام محمود : امال الاتنين التانيين يا اختى هتعملى بيهم ايه ؟ ام اسكندر : هنتاجر بيهم .. يعنى الواحدة اللى تتزنق فى حد للغسيل او المسح او الكنس .. نأجر لها واحد ونبقى لمينا فلوس الجمعية اللى هنعملها كل شهر .. وكمان نخليهم قطع غيار .. يعنى على بلاطة.. الواحدة فينا اللى جوزها حيله مهدود تاخد حيل واحد من العبيد وتركبه لجوزها ..وشوفى يا اختى الكلى بكام والطحال بكام والقلب بكام .. ابو مصطفى: يا نهار اسود .. يخرب بيتك يا ابو محمود على بيت الاخوان والسلفيين والولية اللى اسمها ام اسكندر ..بتنخور ورانا وعايزة تبوظ عقول النسوان ..وقال إيه ....احنا اللى بنعمل فتنة .. يا ولية ياام مصطفى قومى من وسط النسوان وتعالي بسرعة .. ام مصطفي: جري ايه يا راجل ..احنا عاملين جمعية علشان نشارك فى مشروع النهضة اللي هيدخل فلوس كتير وهتساعد على المعيشة والمعايش .. ابو مصطفي: ايه يا ولية يا بنت الكلب.. ولاعشتى ولا كنتى .. وروحى وانتى طالق بالتلاتة انتى والاخوان والسلفيين ومشروع النهضة .