اعتدت منذ أن خرطنى "خراط البنات" أن أحافظ على نضارة وجهى باستخدام المنتجات الطبيعية الطازجة، وكنت في كل ليلة وقبل أن أخلد إلى النوم أقوم بوضع كمية من الزبادى والخيار والطماطم والجزر على وجهي.. ومفيش مانع أحط على "خدودي" الحلوين قطعتين من الفلفل الأخضر وكام عود سبانخ وقرنين بامية بعد تقطيعهما طرنشات.. كل هذا يجعل البشرة أكثر نضارة عند الصباح.. وكنت قد تعلمت ذلك من والدتى التي توارثته عن جدتى.. وبسببه تم تطليقى ثلاث مرات وطفش منى خطاب كثيرون.. إلا أننى لا أستطيع أن أكف عن تلك العادة المتوارثة. وفى الفترة الأخيرة لاحظت أن أسعار تلك المساحيق_ أقصد أسعار الخضار_ قد ارتفعت فجأة.. فكيلو البامية ب25 جنيها وكيلو الطماطم ب7 جنيهات وكذلك الخيار والجزر وحتى الزبادى ارتفع سعره فجأة. وخلال الأسبوع الماضى هاجت الدنيا وماجت على المهندس إبراهيم محلب، رئيس الحكومة بسبب هذا الغلاء.. ولأن محلب صديق شخصى قمت بالاتصال به لأقف عند أسباب المشكلة إلا أنه ألقى بالمشكلة في وجه الدكتور "خالد حنفى"، وزير التموين، قمت أنا بدوري بالاتصال بوزير التموين وحددت معه موعدًا للقاء وداخل مكتبه قلت له: اسمع بقى يا دكتور.. أنا ما يهمنيش إن الناس تاكل وتشرب، أنا يهمنى أن أدوات الماكياج بتاعتى تبقى متوفرة في الأسواق! قال: جرى إيه يا ست سطوطة.. هو انتى شايفانى وزير الصيدليات وللا خبير تجميل؟!.. إيه بقى علاقتى أنا بماكياج حضرتك؟! قلت: أنا ما ليش في الصيدليات يا سيدى أنا ماكياجى من الخضراوات الطازجة واللبن الرايب.. وحضرتك شايف إن أسعار الخضار مولعة نار! قال: ما فيش حاجة مولعة يا ستى.. كل حاجة كما هي! قلت: يا راجل دا كيلو البامية ب25 جنيهًا! قال: يا ستى ما تاكليش بامية لو هي غالية عليكى! قلت: جرى إيه يا راجل انت، هو أنت هتأكلنا على مزاجك؟! بقولك أنا نفسى في البامية! قال: لا حول ولا قوة إلا بالله.. يا ستى البامية حاليًا في بداية موسمها_ بشاير يعنى_ ولازم يكون سعرها غالي كده.. يعنى زيها زى البنت اللى في عز شبابها بتدلع ومن حق الجميل يدّلع يا جميل! قلت: انت كده بتعاكسنى.. صح؟! قال: لا ياستى أنا بعاكس البامية! قلت: طب والطماطم يا سيدى.. وللا كمان هتقولى بشاير وبداية موسم؟! قال: لا تحدثينى عن الطماطم وأسعار الطماطم! قلت: إشمعنى يعنى! قال: الطماطم "مجنونة" يا ست سطوطة وأنا ماقدرش أتحكم في سعرها.. لكن ممكن نتكلم في البطاطس والفاصوليا والذي منه.. فكل الأسعار منضبطة وما يحدث من هرج في الشارع يقصد به النيل منى! قلت: ولما هي الأسعار منضبطة وقعتم في بعض ليه إنت وعمنا محلب؟! قال: ده ياستى بسبب كيلو سكر.. البيه محلب كان عايز ياخده ب4 جنيهات و75 قرشًا لكن البياع أصر على أن يبيعه له ب5 جنيهات.. وأظن أن ربع جنيه زيادة مش هيأثر في دخل رئيس الوزراء.. بس تصدقى يا ست سطوطة أنا أول مرة أعرف أن محلب بخيل بالشكل ده! قلت: طب واللبن والزبادى؟! قال: أنا هجيبهالك على بلاطة في موضوع اللبن ده ياست سطوطة.. أولا كل شركات تصنيع الألبان مصرية 100% وهى أس الفساد وسبب ارتفاع أسعار الزبادى والحليب لأنها تحتكر المنتج.. وعمنا محلب ساكت عليهم وعامل نفسه من بنها ومش فالح غير في العبد الفقير اللى هو أنا! قلت: طب يعنى إيه الحل في موضوع الأسعار ده يا ابن عمى علشان الناس تعبانة؟! قال: الناس تعبانة وهتفضل تعبانة ليس بسبب ارتفاع سعر البامية ولا جنان الطماطم.. إنما بسبب الدخل الشهرى الضعيف للمواطن.. ياست سطوطة مافيش موظف في العالم كله بيقبض الراتب الذي يتقاضاه الموظف المصرى! قلت: طب يعنى مين السبب في الغلب.. وزارة التموين أو وزارة المالية؟! قال: محلب هو سبب كل البلاوى ياست سطوطة بس الكلام ده مش للنشر.. فالحكومة عمالة تلف نحو نفسها وكل يوم عندها مشكلة والسبب هو حالة الفقر التي يمر بها الشعب لأن محلب رافض يزود الرواتب كى تتناسب مع ارتفاع الأسعار.. وأنا بصراحة بهدى النفوس ولا أقصد أن أهيج الشعب ضد محلب كما قام هو بتهييجه ضدى! قلت: يعنى أنتم عمالين تحدفوا المشاكل على بعض والضحية هو المواطن الغلبان يا عم حنفى! قال: ياست سطوطة إحنا كلنا بنشتغل في حكومة مؤقتة وآديها أيام بتتقضى حتى يأتى مجلس النواب وسنذهب إلى حيث أتينا! قلت: طب إذا كان كده بقى يبقى أنا هصدع نفسى معاك ليه أنت ومحلب وحكومتكم المؤقتة.. لينا ربنا بقى هو المعين عليكم وعلى كل مسئول في هذا البلد حاطط في بطنه بطيخة صيفى.. إلا قولى ياسيادة الوزير.. هو البطيخ بكام النهاردة؟! وهنا صاح الوزير وأخذ يشد في شوية الشعر اللى فاضلين في دماغه فتركته وخرجت عائدة إلى درب الفشارين لأنقل لكم ما دار!
