دشن النشطاء على موقع التواصل الاجتماعى "تويتر" هاشتاج "لو مرسى ساب الحكم"، يصفون من خلاله مشاعرهم إذا ما ترك الرئيس مرسى الحكم, ورصد الهاشتاج فرح النشطاء إذا ما تخلى مرسى عن الحكم. آدم ذى أندر تيكر قال: "لو مرسى ساب الحكم هديله كورسات إنجليش فرى". وقالت من أطلقت على نفسها سوسته: "لو مرسى ساب الحكم مش عارفه إيه هايكون أو هايحصل, بس عندى إحساس إنى هاحس براحة باال طول ما الإخوان بعيد عن الحكم ومصر". إسراء خيرى قالت: "لو مرسى ساب الحكم حنكسر وراك زير يا أمور". محمد رشاد قال: "لو مرسى ساب الحكم نمشيها مفاوضات بقى كل واحد من الشعب يمسك الحكم يوم إشطة بقى". محمد الصواف قال: "لو مرسى ساب الحكم حمدين هيفرح أوى". محمد الحسينى قال: "لو مرسى ساب الحكم يبقى الراس الكبيرة اللى هتمسكها خيرت الشاطر". وقالت إسراء ساسا من تركيا: "لو مرسى ساب الحكم وعد منى أنزل مصر أعمل أول عرض أزياء ليّا هناك إن شاء الله". فاطميتو قالت: "لو مرسى ساب الحكم لو بأة.. هوزع شربات". وقال رضا عثمان: "لو مرسى ساب الحكم طيب يسيبه ويروح فين؟!". إسراء سيد قالت: "لو مرسى ساب الحكم دانا ممكن أتشل من الفرحة ساعتها". أما جهاد فتوعد قائلًا: "لو مرسى ساب الحكم هسقط أول رئيس ييجى بعده... ونقضيها لعب بقى". محمد أشرف قال: "لو مرسى ساب الحكم هجيب 101% السنة دى". وقال محمد فؤاد: "لو مرسى ساب الحكم قبل الفترة ما تخلص ومش بمزاجه يبقى مفيش رئيس هيكمل شهر فى مصر بعد كده". ريمون محسن قال: "لو مرسى ساب الحكم قطر ممكن تروح فيها!!". وقال الليثى محمد: "لو مرسى ساب الحكم ندرٍ عليّا لبدأ أذاكر بجد". بسمة يوسف قالت: "حلم ويا سلام لو يتحقق لو مرسى ساب الحكم". أميرة عبد الحكيم قالت: "لو مرسى ساب الحكم!! هو مرسى أصلًا بيحكم!!". وقال عمر مرسين دى أكس: "لو مرسى ساب الحكم المرشد هيدبحو". وقال أحمد فاضل: "لو مرسى ساب الحكم وهو مرسى إيه علاقته بالحكم؟؟". أبو صلاح الهلالى قال: "لو مرسى ساب الحكم بس يا ريت مايسبهاش لحمدين". السعدنى قال: "لو مرسى ساب الحكم هيأجر القصر الرئاسى". وقال ربيع برون: "لو مرسى ساب الحكم حسب الطريقة اللى هيسيبه بيها، هيتحدد رد فعلنا وموقفنا". جون رادميس قال: "لو مرسى ساب الحكم هيشتغل مذيع فى قناة الحافظ، فالناس هتتفرج على باسم يوسف". إيهاب حسنين قال: "لو مرسى ساب الحكم يبقى الجماعة الإسلامية حتنزل الساحة ونتفرج على أفلام الخيال العلمى فى شوارعنا". نورا المشتولى قالت: "لو مرسى ساب الحكم هيقعد مع مبارك فى طره". عمرو جمال قال: "لو مرسى ساب الحكم بردو هنهتف يسقط حكم المرشد". رو ناجى قالت: "لو مرسى ساب الحكم هيطلعلك حد..هيقولك شوفتوا!! خربتوا البلد".