مساء الخير. يااا أهلا بيكم. إحنا النهارده هنتكلم عن كائن غير مجهرى. يعنى يُرَى بالعين المجردة ويُسمَع صوته العالى فى الاتصالات التليفونية بقعدات الفقع المباشر. قصدى البث المباشر. ياااااه.. سبحان الله.. شوف شوف.. كائن أنا شخصيا مش عارف أوصفه. كائن يتكاثر بشدة مع الفلول. ويأخذ جانب العسكر ع الفاضية والمليانة ويقول لك أنا محلل. وحاجة يعنى فظيعة شنيعة مريعة. الكائن ده فيه منه أنواع ورُتب وفصائل. يعنى عندك الكائن الكاطو. الكاطو ده يا سيدى منبته على ما يبدو فى بيئة صحراوية جرداء. حتى تحس وهو بيتكلم إن ريقه ناشف. شوف شوف ازاى. شوف الكائن الكاطو.. عمّال يتهم الناس (أه أه أه أه) دى ضحكة يا اخوانّا على فكرة مش كحة. شوف الكائن الكاطو عامل فيها ازاى عارف كل حاجة، وإلا لما يقول لك المجلس صابر على الشعب صبر أيوب.. ربنا يشفيك يا أيوب. (أه أه أه) هو لسه فيه كائنات كده يا اخوانّا..يا الله..زميل الكائن الكاطو بقى ساكن فى القوقعة اللى جنبه.. شوف شوف مش على بعضه ازاى عمال يتنطط ويتزفلط.. أيوه..إنتو عارفينه أهه. الكائن السويلم. وهو من الفقاريات ويمكن تصنيفه من الثدييات على أساس أنه يلد، وأنا بقول لكم إنه أحيانا يبيض. سبحان الله.. شوف شوف كلامه المترهل. شوف اتهاماته للناس وهو نايم ومش متغطى.. كائن غريب.. كائن مريب.. وفى الاتنين نموذج إنه ازاى كائن من المتغذيين على الفجل والكُرّات ممكن يبقى محلل!! شوف شوف.. ويخلُقُ ما لا تعلمون.