نادية: انتظرنا الرئيس عند المنصة من 11 ليلا أم إبراهيم: عملت الأكل وأكلنا سوا عيش وملح قباري: السيسي قال لنا أنا بحب الأكل الشعبي شبهكم ثلاث من أسر منطقة غيط العنب بالإسكندرية كانوا حديث أمس الاثنين بعد موافقة الرئيس عبدالفتاح السيسي على الإفطار مع أفرادها عقب تسليمهم شققهم بمشروع التطوير الحضاري. وروى أفراد الأسر التي استقبلت الرئيس ل"التحرير"، كواليس إفطارها مع السيسي، إذ تقول الحاجة نادية، ربة منزل: "إمبارح اتنقلنا من بيوتنا القديمة، وجينا المساكن الجديدة وسلمونا وجبات ونزلنا في عقار رقم 15 بشكل مؤقت، لحين تسليمنا شقتنا من جانب الرئيس". وأضافت: "لكن إحنا مقدرناش نستنى في البيت ونزلنا بالليل الساعة 11 وقعدنا عند المنصة مستنيين الرئيس لما يوصل علشان نكون في استقباله، وفعلا جه السيسي وسلمنا شقتنا فى بلوك رقم 3 شقة رقم 47 الدور ال 11". وتابعت نادية: "عزمنا الرئيس على الفطار وكنا مبسوطين أوي إننا قاعدين معاه". وعبرت الحاجة أم إبراهيم، إحدى المشاركات في الإفطار مع الرئيس عن فرحتها بسكنها الجديد بقولها: "قالوا لنا من سنين فاتت إن هناك مشروع لتطوير العشوائيات قولنا ده كلام وخلاص، ولحد ما اتحقق وأخيرا هنعيش فى شقة زى الناس". واستدركت: "كنت خايفة البيوت القديمة بتاعتنا تتهد ونعيش فى الشارع لكن الرئيس أوفى بوعده فعلا"، مستكملة رواية استعدادها للقاء السيسي: "أنا من إمبارح أنا وجوزى صاحيين محدش فينا نام من الفرحة بإننا هنقابل الرئيس الصبح ولحد ما قابلناه واحنا مش مصدقيين من الفرحة". وأوضحت: "جه الرئيس الصبح طلع يسلم علينا ويبارك لينا على إننا اسلتمنا الشقق وإحنا مسكنا فى الرئيس بقلب إن هو يقعد ياكل معانا ووافق فعلا". وتابعت:"أنا اللى عملت الأكل وكان عبارة عن فلافل بسمسم وجبنة بيضة وجبنة تركى وبيض مسلوق وحلاوة وزتيون مخلل، وقعدنا سوا 3 أسر ناكل وهو قعد وسطنا وكان مبسوط ويدوب هو أكل لقمة وقال أنا كدة الحمدالله أكلنا سوا عيش وملح". قبارى إبراهيم قبارى، أحد الأهالي المشاركين في الإفطار مع الرئيس قال ل"التحرير": "احنا لسة جايين إمبارح قعدنا فى بلوك 15 لحد الصبح إما الرئيس سلم لينا الشقق". وتابع: "لما عزمنا الرئيس على الفطار قال لنا موافق بس أنا بحب الأكل الشعبي شبهكم"، مضيفا: "حسينا كده إن الرئيس واحد مننا وقاعد مع أهل بيته". وأكد قبارى أن الرئيس أعفاه من الإيجار نظرا لحالته الصحية وعدم قدرته على العمل، إذ كان من المفترض أن يقوم بدفع إيجار 300 جنيه فى الشهر و50 جنيها استخدام "أساسنير"، لشقة مكونة من 3 غرف نوم وصالة وحمام ومطبخ، ومجهزة من كل حاجة جميع الأجهزة الكهربائية وعفش كامل جديد عمرنا ما كنا نحلم بكل ده".
