أعلن حمدى قشطة، عضو حزب الدستور، المحبوس فى معسكر الكليو 10 ونص، إضرابه عن الطعام، أول أمس الخميس. كتب قشطة في رسالته: "مضرب لأجل حريته.. بسم الله الرحمن الرحيم.. من أجل حريتي.. واحشاني جدًا يا حريتي وأعرف كويس إنه مينفعش تتقيدي أو مش أشوفك حتى لو كلفني موتي.. أنتي تستحقي ده، حرية الأرض.. الأرض تستحق ده. عدم التفريط في أرضنا يستحق ده". وقال: "سماع صوت عياطك وأنتي لسه صغيرة يستحق ده.. اتأكدي إني هوصلك وهعيشك وهحضنك.. إعرفي إني رافض أتحبس واتحاكم في قضيتين بتهمة واحدة.. تهمة إني رفضت بيع أرض البلد وقولت إنهم مصريتين آه والله متستغربيش.. الأرض اللي استشهد فيها واتأسر جنود زيي وزيك يا حرية مصريين". وأضاف: "عايزك تكوني متأكدة تكوني متأكدة تمامًا إنهم فعلًا مصرييتين دم الجنود اللي استشهدوا فيها هو اللي قال قبل ما يقول الورق والتاريخ والمواثيق والاتفاقيات.. وبعد كدا حكم محكمة أكد إنهم مصريتين ولا يجوز التفريط فيهم.. ورغم كل ده اتحكم عليا ب 3 سنين ومائة ألف جنيه.. يا حرية أصلًا قالولنا زمان إن الدفاع عن أرض الوطن واجب وشرف.. وقالولنا دلوقتي إنك موجودة ومكفولة في الدستور، ورغم كدا لما بنعتمد على وجودك بيحبسونا". وذكر: "خلي بالك يا حرية معنديش غير السلمية طريق ليكي.. وخلي بالك يا حرية السلمية طريقك ومبدأك.. ويهون أي شيء في سبيل إني أعيشك وأحضنك.. بصي أنا قررت وأضربت عن الطعام من الخميس 21/7/2016 الساعة 12 منتصف الليل، يا إما أموت أو أعيش بيكي وليكي.. أنا مصري بدافع عن أرضي، مكاني مش السجن.. أنا مضرب من أجل حريته.. وأولًا وأخيرًا موكا".