أطلق رئيس الزمالك، عدة رصاصات مهاجمًا عدد من الشخصيات، خلال مداخلته الهاتفية، مساء اليوم السبت ببرنامج "انفراد" الذي يعرض على قناة «العاصمة»، قائلًا «يا محمد يا أمين قول جايب فلوسك واشتريت قصر ب 10 مليون دولار لمراتك منين». وانتقد عضو مجلس النواب، تعامل الدولة مع بعض المخربين على حد وصفه، قائلًا «إيه الدولة المهزوزة والقرف والفوضى اللى إحنا فيه ده، لازم يبقى فيه دولة والدولة يعنى قانون. وأشار إلى أن الاحتجاجات التى أطلقتها نقابة الأطباء، خلال الأيام القليلة الماضية، «الأطباء يعني الرحمة، ومنى مينا اللى بتخوف العيال الصغيرة، يخربيتها، لمى نفسك يامنى، إنتى مولعة مصر من 2010. وتابع الكلام ده مش موجود في أي بلد في العالم الكلام ده في مصر بس، لأن من 2011 البعض افتكر إن الثورة هي الفوضى، والقانون غائب المفروض لو ظابط تعدى على دكتور يتحاسب والعكس. وعلق على تصريحات تيمور السبكي المسيئة لنساء الصعيد، مؤكدًا أنه سب جميع نساء مصر بتصريحاته، متساءلًا، كيف تُفتح القنوات لواحد قليل الأدب زي ده، والست الصعيدية اللي مش عاجباه دى ب 100 راجل». وتطرق رئيس النادي الأبيض، للحديث عن واقعة «الواقي الذكري» التي قام بها الممثل الشاب أحمد مالك، والمراسل شادي حسين، يوم عيد الشرطة الماضي، قائلًا «الدولة رفضت تقبض عليهم عشان أمريكا والدول هتتقلب علينا، حقوق إنسان وزفت الطين إيه، إيه السفالة اللي أحنا عايشين فيها دي، ويقولك مرتضى منصور بزىء، أنا عمري ما شتمت حد وطني ولا سبيت الجيش، هو مين مع مين». وطالب عضو البرلمان، ياسر رزق رئيس تحرير جريدة الاخبار، بتحري الدقة فيما يكتبون في جريدته المحترمة، مضيفًا «مين دول، وأنت ازاى تسمح للمجاري دى تكتب عندك». وأردف، بطلوا هيافة، الشعب ماعادش طايقكم، أنا بحترم محمود سعد لأنه مشى واحترم نفسه واختار أنه يربى أحفاده، ويا لميس اقعدى فى البيت كفاية». وواصل، «أنا لو وزير أفضل ألاقى مظاهرة ضدى ومجلس النواب يستجوبنى والتوك شو بالليل بيهاجمني يبقى أنا بعمل إيه، أحترم نفسى وأمشى أحسن، نظام مبارك اللى وقع فى وسط فى 60 سلامة، المهم البلد ما تسقطش، مهاجمًا محمد أنور السادات، رئيس حزب الإصلاح والتنمية، أنا عايز أعرف جاب المليارات دي منين بعد ما أعلن إفلاسه». وأكمل، أنا حزين وقرفان ومحبط، والبلد دي اللي ربنا حاميها، من فضلك يا سيادة الرئيس، انت رمز الدولة شفت النواب بيحبوك النهاردة إزاي، طبق القانون ياريس، إضرب بيد من حديد بالقانون، ولازم يتقبض علي منى سيف، لأنها بتحرض على الفوضى، وبتروج اشاعات. ووجه حديثه للناشطة جميلة إسماعيل، قائلًا، «خلاص يا جميلة إحنا قرفنا بقى، الخناقة اللى اتعملت بينها وبين أيمن نور كانت بسبب الفلوس، وإلى عمرو الشوبكى، أنا بفوقك إنت سقطت قدام أحمد مرتضى منصور، وعبد الحليم قنديل عمال يقل أدبه على مصر كلها، بس يعتبر واحد من المجانين اللى متشافين، وهما دول الصفوة اللى بيحكموا البلد». واختتم، أنا مكمل فى الرياضة وفى السياسة وكل شىء، واللى مش عاجبه إشرب من أقرب خرارة، مصر اللى ربنا كرمها فى القرآن مش هتهان من بعض الرعاع.