علق الإعلامي عمرو أديب، اليوم الأحد، على مشهد سجادة الرئاسة الحمراء التي تحرّك عليها موكب الرئيس عبد الفتاح السيسي، خلال افتتاحه عددًا من مشروعات الإسكان والخدمات بمدينة 6 أكتوبر، أمس السبت، قائلًا: «كل الناس اتكلمت عن السجادة، ومحدش فتح بوقه تجاه افتتاح السيسي ل34 مشروعًا باستثمارات قيمتها 16 مليار جنيه». أضاف أديب، خلال تقديمه برنامج «القاهرة اليوم»، عبر قناة «اليوم»، «لازم حد مسئول في رئاسة الجمهورية يرد على الانتقادات الموجهة، يقول إنهم غلطانين، يقول إنها موجودة من قبل كده، يقول زي ما يقول، أهم حاجة حد يرد، محدش جاب سيرة الإنجازات اللي بتتعمل ومسكنا في السجادة، وأنا لو من السيسي يجيلي نقطة بسبب اللي حصل ده، مع أن السجادة معانا على طول، في كل الاحتفالات والتشريفات». تابع: «نستشف مما يحدث أن الشعب أصبح حر وقادر على محاسبة رئيس الجمهورية نفسه، مع إننا كنا قبل كده محدش يقدر يتكلم بكلمة واحدة، والفضل في ذلك يرجع إلى ثورة يناير، 25 يناير، هي من هدمت أسطورة الخوف من الحاكم، لو 25 يناير معملتش حاجة زي الناس ما بتقول كان زمانا محدش بيفتح بوقه، بقى عندنا رأي عام قاسي في مصر، عندنا حريات، وأقسم بالله ما كنا نقدر نتكلم في عهد أي رئيس قبل كده».