عقب الهجوم الناري الذي شنه خالد الغندور لاعب الزمالك السابق، على شركة "فودافون" التي نجحت مؤخرًا في الحصول على رعاية الأهلي، والتى وصف فيها الشركة بأنها غير مباليه أو مهتمه بفريق الزمالك الذي حصل على بطولتي الدوري والكأس الموسم الماضي، أو حتى مشاعر الزملكاوية من عملائها، انهالت الدعوات من قبل جماهير القلعة البيضاء، لمقاطعة شركة فودافون، والذهاب لأي شركة أخرى. نرصد لكم أبرز تعليقات وتغريدات رواد مواقع التواصل الاجتماعي "تويتر" من مشجعي الأبيض، وردود الجماهير الحمراء التى غلب عليها طابع السخرية. قال شكري: "من وأنا صغير بكره فودافون عشان بشوفها علي تيشيرت الأهلي ولما أهلي جابولي خط فودافون سبته وجبت خط تاني". كما علق أبو النور، قائلًا : "يا أخى أنا اتصالات وهقاطع فودافون بالعافية". ورد عليه محمد الراصد: "عاوز أقول للزملكاوية إحنا نوقع فودافون ونعلمها الأدب ونخسرها فلوس الرعاية دية أولوية. فمش هتفرق موبينيل من اتصالات حاليًا". بينما أكد عادل حسام، قائلًا: "الحمد لله أنا أول واحد قاطعت فودافون ورميت الخط اللي كان فاتورة وهما عايزين مني 250 جنيه أه وربنا زي ما بقولك كده 250 جنيه". وعلق أحمد على دعوة المقاطعة: "أيوة إحنا مقموصين وهنقاطع فودافون واللي مش عاجبه يشرب من أي خرارة". وازاد الأمر سخونة بعد ردود جماهير الأهلي الساخرة، حيث قالت غادة جمال: "إنتوا لو قاطعتوا كل الشركات الأهلاوية وربنا ولا هتعرفوا تاكلوا ولا تشربوا ولا تعيشوا أصلا". وقال أحمد سامي: "طب إنتو كزملكاويه راضيين عن نفسكم لما تقاطعوا فودافون.. يبقا لازم تقاطعوا اتصالات وساويرس موبينيل وكل راعاة النادي الأهلي". وعلق محمد أبو زيد: "هو ده تمامكم طول عمركم مش عارفين حتي تدخلوا في مقارنة مع الأهلي فبتدوروا على أي حاجة تعملوا بيها شو عشان يتحط اسمكم جانبب اسمه". وأضاف مصطفى سيف: "بما إن شركة فودافون راعية للاهلى وموبينيل صاحبها أهلاوى واتصالات قالت هنفضل نحب الأهلي كدة مفيش غير شبكة الشناوي". كما قال عاطف في تغريدة له: "كمية حرقان فى الهاشتاج ده أول مرة فى حياتى أشوفها.. فودافون أهلاوية واتصالات بتحبنا ونجيب ساويرس أهلاوى".