تعب الهتاف مننا، تعْبت ببان مِ الدَّق والحق فات من هنا، واتدارى منّا فْ شَق عايزة ابن عمه بقى، ولا انتى عايزة الحق؟ عشان باحبِّك قوى حَ اقول ف وِشِّكْ: (لأ) يا (لأ) يا كلمة السر اللى فى روحى لولاكى انا صَرْختى لا تقول ولا توحى وانتى اللى وردة تعب، يا وردتى: فُوحى وانتى اللى طلقة غضب، يا طلقتى: رُوحى كل الغُنا (آهات)، فينك يا غنوة (لا) غامِس فِ ملح السُّكات عِيشى بلا مبالاه بس النهارده اكتبى يا مصر باسم الله: لأه عشان النبى، لأه عشان الحياه بالحبر حَ اكتبها وغضبها يكتبنى ح افضل أحببها فى بنتى وف إبنى وحدى ح اصدّقها لو كله كدّبنى (لا) مش ح تنفينى، لأ دى اللى حتجيبنى لا الصمت ح يقولها فى وِسْط دَوْشِة (نَعَمْ) مكتومة فى نُولْها تِغْزِل كَفَنْ فِ العدم ولا إيدى ح تطولها تحدفها طوبة ف صَنَم قولها بمَلْو الحلوق: كلّا، ولا، لَنْ، ولَمْ والله لو وحدى، ح انزل وح اكتبها! مهما السُّخام كان على الصورة مِهَبّبها وح اعتبر (لا) استقالتى منكو واسيبها عريانة ف الصندوق من غير ما اسبّبها!