شنت الفتيات على مواقع التواصل الاجتماعي " فيسبوك " هجوما عنيفا على الشباب الذين يقومون بنشر صور فتيات بطولة كأس العالم ومعلقين عن بنات مصر بأنهن " غفر ". هند محمود قالت على صفحتها " المشكلة فعلا إن الرجالة في مصر محتاجة تتكسف من روحها، أي والله تتكسف من روحها شوية بعد كل اللي بيحصل للبنات، وبعد كل اللي احنا عايشين فيه ده مش كمان يبقوا بيشيروا صور مشجعات وسعداء أوي كده ". ملكة بدر قالت " لا مؤاخذة .. نسيت إن كأس العالم فرصة للرجالة المصريين عشان يشيروا صور المزز المشجعات في المدرجات ويقارنوا بينهن وبين " الغفر " اللي بيشوفوهم في مصر، معلش منك له، ما هو لولا وجودك في الحياة، ماكناش فكرنا ألف مرة في اللي بنلبسه وفي شكلنا قبل ما نخرج من بيوتنا، ماكناش اتقهرنا وكرهنا جسمنا وكرهنا روحنا وكرهنا كوننا ستات أصلا ووجودنا على كوكب الأرض، لولا وجودك بكرشك بشكلك المعفن اللي شبه قعر أنبوبة البوتجاز (علمًا بإن الأنبوبة لها فوايد كتير بينما إنت كل اللي بتعمله في الحياة إنك بتربي كرش وبتتكرع وتلعب في صوابع رجليك وإنت مستني الخدامة اللي اتجوزتها تجيب لك كوباية المياه لغاية عندك)، كان زمان فيه حاجات كتير اتغيرت، أولها وأهمها ما نتحرمش من الابتسامة على وشوشنا ولا الإحساس بالأمان في حياتنا ". هالة سيد علقت بقولها " لكل راجل مصري.. بص على كرشك الأول". أما رنيم محسن فعلقت بقولها " شوف نفسك الاول قبل ما تجي تنتقدني جتكم القرف عالم تغم ويجي يقولك إن إحنا اللي بندور على النكد ". قالت رغدة غنيم " الرجالة مش واخدين بالهم انهم السبب الرئيسي في مظهر ستات مصر الحالي، بجاحة مفيش بعد كده وبعدين يعني هو احنا وحشين وهما اللي قمرات، ما يبصوا على نفسهم الأول ". فيما علق بعض الشباب على ما قالته الفتيات بأنها " نفسنة وغيرة من مشجعات كأس العالم ".