شيخ الأزهر يعود غدًا من فرنسا بعد نجاح عملية القسطرة ,ده كان خبر اليوم و كل كام يوم, مسئول يسافر بره يتعالج من اى حاجة ,بداية من علاج ضرس انعدام العقل مرورا بالمرارة لزرع شعر ويتخللهم شد وش ساعات وعمليات خطيرة اوقات , ومع سفر كل مسئول اكتشف ان مصر بلد غنيه جدا مع كل النهب ده فلوسها مبتخلصش , واقول فينك يا عم هيرودوت تحضرنا علشان تغير مقولة مصر هبة النيل لمصر هبه بنت عم الريس واصحابه بما فيهم الشيخ الطيب, ايه الوقعه السوده ديه حتى انت يا شيخنا مش مستحرم مال الشعب الغلبان, ديه قسطره فى نص ساعة تخلص تسافرلها فرنسا وكله على افانا ليه ,دايما كده مفيش حد من علية قوم النظام الا ويتعالج بره ,والله ما عندى اى اعتراض انا مش حقوده, بس بفنوسنا يا كناب , كده كتير مالها مستشفى احمد ماهر التعليمى , مره رحت تدريب لمدة يوم فيها , فلقيت قطط شوارع بتمرح فى كل حته ,فقلت للدكتور ازاى فيه قطط فى مستشفى ,رد قالى ده بيت الريس فيه قطط قلتله عادى, طلع ولا نزل اسمه بيت مش مستشفى فيها مرضى مش متحملين اى تلوث, اقول ايه شعب مكتوب عليه مستشفيات قطط الشوارع ونظام مكتوبله مستشفيات القطط الشقراء اللى شعرها اصفر تمرضه , وافتكرت لما كمال الشاذلى سافر يتعالج فى امريكا وقعدله كام شهر قلت عادى راجل مقتدر ومن موظف كحيان ببسكلته فى مكتب العمل بالباجور لصاحب قصور وارصده بالملايين ونسب فى شركات ,مع انه موظف حتى لو وزير موظف فى الاخر, منين ده كله وقلت عيب عليكى انتى مالك دعى الخلق للخالق ,لحد ما عرفت انه اتعالج على نفقة الدولة ساعتها اتأكدت ان مصر هبه بنت عمه هو كمان ,بس ارجع واقول جت عليه ده وزير الصحة بذات نفسه صاحب مستشفى دار الفؤاد سافر لندن يطمن على صحته ويعمل كشف شامل شكل فؤاده مش مطمن لدار الفؤاد وحرمه اتصرف عليها 2 مليون جنيه فى امريكا وكله على حسابنا وبعد ما قال هدفعهم عند النائب العام قال امبارح مدفعتش حاجة طبيعى هو حد من علية القوم بيدفع حاجة هبه كتر خيرها قايمه بالواجب وزياده, ولا انكلكوا بطرس رخيص عمل عملية الانفصال الشبكى فى امريكا وخد معاه المدام وخرج فى نفس اليوم من المستشفى, وقعد عشرة ايام يتفسح فى امريكا مع المدام وكله على افا الشعب حتى السرمحه على افا الشعب, عينى عليك يا شعب عارف يا شعب الوزير كان بيتعالج على حسابك وبياخد جنب فلوس العلاج بدل سفر ومش لوحده والمرافق اللى هى المدام كانت بتاخد بدل سفر, محدش يسألنى ازاى ,عيب يا جماعه دعوا الوزراء لهبه تصرف عليهم مش بنت عمهم احنا مالنا هى هبه تقرب لاى حد فينا علشان يبقى لينا وش نطلب من هبه هبه ,ويبقى السؤال لما اصحاب الملايين من سياسين وفنانين وعلية القوم والنظام بيتعالجوا فى بلاد الفرنجه والعم سام على نفقة الدولة من الالف لاخر الكتاب ,جت على الشعب مالوش حق هو كمان مبقولش بره خلينا جوه دا المريض بيدخل المستشفى الحكومى وقطنه فى ايده وشاشه فى جيبه حتى الحقنه بيدفع تمنها, مصر اصبحت حقنة الشعب هبة النظام ,والسلام امانه تسلمولى على هبه لو حد شافها فى وسط البلد ,ويظل خبر اليوم هو خبر كل كام يوم سفر للخارج وعلاج على نفقة هبه. واختم بنص كلمه للكاتب احمد رجب بيقول فيها اذا الشعب يوما أراد اللحوم فلابد أن يستجيب البقر ولابد للبط أن يختفي ولابد للوز أن ينتحر فقدنا الفراخ وكل الطيور ولم يبق إلا حديث الهبر وقالوا ده سعر اللحوم كبير يضر المرتب كل الضرر...وان الدراهم لا تشتريه فسعر اللحوم كسعر الدرر......فقلت وليس أمامي سبيل سآخذ واللحم بعض الصور.
