سيادة الرئيس السابق حسني مبارك بعدما اتخلعت من الحكم بقرار الثوار أبطال ثورة 25 يناير كنت قد قررت بيني وبين نفسي وبين صاحبي المسطول برضه ألا نكتب عليك عملا بمقولة «ارحموا عزيز قوم ذل» والحمد لله أنا وصاحبي المسطول من أكتر من خمس سنين كتبنا عليك وعن ظلمك وطغيانك وجبروتك واحتلالك انت وعيلتك لمصر ثلاثين سنة ضاعت فيها كرامتنا وطلعت عين أبونا انت وعيلتك اللي حكمونا وسرقونا بعدما احتلونا احتلال أسوأ من الاحتلال الأجنبي. وعلي فكرة الوقت اللي اتكلمنا فيه أنا وصاحبي المسطول عن عائلة مبارك اللي سرقتنا ونهبتنا ما كانش في حد يقدر يفتح بقه غير قلة قليلة من الكتاب والصحفيين وتقريبا لايزيدون علي عدد أصابع اليد الواحدة وهمه للأمانة والتاريخ أولهم استاذي وتاج رأسي الموهوب ابن الموهوب العبقري إبراهيم عيسي. وقبل عندليب الصحافة المصرية الكاتب الصحفي الكبير عبدالحليم قنديل، وثالثهم الأديب المصري العالمي د.علاء الأسواني ورابعهم الكاتب الصحفي الكبير عبدالله السناوي وخامسهم أنا وصاحبي المسطول ما احنا الاثنين واحد غير الخمسة دول كان جميع الصحفيين والإعلاميين والفنانين في عهد الرئيس السابق مبارك واللي عاملين مناضلين دلوقتي ما كانش حد فيهم يقدر يقول «بم» وعلي فكرة الشعب المصري أذكي من هؤلاء المنافقين والمناضلين الوهميين والشعب المصري عارفهم وكاشفهم وحافظ كلامهم اللي قالوه عند تأييد الرئيس مبارك وتأييد التوريث لابنه جمال مبارك وبعد نجاح الثورة غيروا موقفهم زي ما بيغيروا «ملابسهم» وهاجموا مبارك وعيلته سيادة الرئيس السابق مبارك صاحبي المسطول مفقوع منك وبيقولك انت حكمتنا وسرقتنا ودلوقتي بتطلع لسانك لنا لأنك كابس علي نفسنا كلنا وطلعت روح أمنا وبرضه مش عايز ترحل عننا ارحمنا بقي وارحل عننا طلعت روح أمنا خلي عندك دم ده أنت طلعت روح أمنا بروح أمك الله يرحمها ولا يرحمك. وبالبلدي كده «ارحل عننا بروح أمك طلعت روح أمنا». وفيه برضه رسالة مني ومن صاحبي المسطول لأبطال وشباب 25 يناير «خلو بالكم مبارك رغم خلعه مازال يحكمكم» ومع ان الثورة انتصرت في خلع مبارك إلا أنها ما انتصرتش في خلع نظام مبارك مع أن الثورة كان هدفها وعنوانها «الشعب يريد اسقاط النظام».
