بعد مذبحة الخنازير الشهيرة، والتي تفوقت علي مذابح الصومال وبعد أن أعلن وزير الصحة ربنا يديله الصحة انه استعد بالمقابر الجماعية عشان كل مواطن يطمن علي رقدته لامؤاخذة، ومافيش ندل يطلع يقولك رمونا للكلاب، وبعد التعاقد مع عزرائيل علي توريد الجتت علي دفعات بعربيات الكارو عشان الخانقة والحر دخلت انفلونزا الخنازير مصر تتدلع وتتمايص ولا الغوازي زمان، والغريب انها جاية من عند الحاج أوباما تقولشي كانت مستنية لما يرجع أمريكا بالسلامة، وتيجي تضايف عندنا؟! ولا جايز بقي جاية تنتقم لضحايا المذبحة، الذين تم قتلهم بالجير الحي، ولسة عفاريتهم بتطلع لحد دلوقت؟! وتنط في وش بتوع الصحة والجزارين؟! دخلت انفلونزا الخنازير مصر وبدأت في الانتشار السريع لأننا شعب مضياف معروف بكرمه، والمشايخ الذين أفتوا بجواز دفن ضحايا الوباء دون الصلاة عليهم، وقفوا يصرخون ياخفي الألطاف.. نجنا مما نخاف.. وارحمنا من الحلاليف.. داحنا مش لاقيين الرغيف، لكن.. ولا واحد فيهم افتي بتأجيل العمرة هذا العام، المشايخ الذين يقلوظون العمة، وينطون في وجوههنا كالخفافيش، ويرقعون الفتاوي كما يرقعون الفتة والتي تجعل منا جميعا ولاكفار قريش في زمانهم، كل كافر ماشي وشايل في إيده هبل واللات والعزي، وكل كافر قاعد علي القهوة يضرب بانجو وجنبه الصنم بتاعه، عشان يحميه من المخبرين، والمشايخ الذين حولوا حياتنا إلي نار موقدة، وحطونا في أسياخ زي الكفتة ثم يقبضون وينصرفون في عرباتهم الفارهة لقعدة المريدين والاتباع ولا واحد فيهم يمتلك الجرأة ليضع حدا للكارثة القادمة نتيجة العمرة، جايز بيوزع علي الناس الأحجبة والأعمال، التي تمنع المرض وتنزل الدود، وتعمي عنك أنفلونزا الخنازير. حتي مولانا فضيلة شيخ الأزهر، الذي حول الفتوي إلي ظاهرة سياسية، وأعلن أن المواطن الذي لايذهب لانتخاب السيد الرئيس، اثم قلبه، وكافر ابن كافر، ثم أخذ يوزع الشهادة علي من يريد، وأفتي أن سوزان تميم شهيدة بينما الشباب الذين غرقوا علي سواحل إيطاليا، ليسوا شهداء لأنهم طماعون، حيث تركوا نعيم الوطن اللي مغرق الكل، وطلعوا علي إيطاليا يدوروا علي المزز الطلياني حتي مولانا لم يصدر حتي الآن فتوي بتأجيل العمرة منعا لانتشار الوباء، فماذا ينتظر مولانا؟! خاصة أن السعودية لن تصدر مثل هذه الفتوي لأسباب اقتصادية طبعا، أم أن مولانا قال للمعتمرين استفتي قلبك.. فقالوا في نفس واحد العين صابتني ورب العرش نجاني يامولانا؟! وكل واحد ها يرجع وفي ايده يافطة ماتبصليش بعين راضية بص لأنفلونزا الخنازير اللي فيا. محمد الرفاعي