اعلان احمد مكى الفنان طبعاً مش الوزير .. هو اعلان عبقرى حين قال مش أى ميكس يظبط دائماً وانما الميكسات انواع . دونت ميكس (don't mix ) مقولة رائعة لرئيسنا المبدع حين تحدث فى ألمانيا بزهو وبطلاقة إنجليزية موضحاً استحالة دمج الكحول مع بنزين 95 .. وأنا مثلى الأعلى الريس ولكن أحب أوضح لسيادته أن دونت ميكس فقط فى ألمانيا إنما فى مصر كل حاجة بفضل جماعته بقت ميكس . 1- فحين يعين أبن الرئيس فور تخرجه فى أحسن وظيفة حكومية فهل هذا "ميكس" ولا " دونت ميكس " .. نصيحة أقدمها لأبن الريس روح بكره استلم الشغل وتبت فيه قبل ما الريس يرجع فى كلامه كالعادة . 2- وحين يعين ياسر على النافى الرسمى للناقل الرسمى للاخوان فى وظيفة رئيس مركز دعم اتخاذ القرار .. نقدر نقول انه "دونت ميكس" لو المركز عنده جرب لأن ياسر على طبيب جلدية وتناسلية وهذا التعيين تطوعى علشان الدكتور رايح يشفيه وبالمرة يبقى الدكتور يعدى على قناة الحافظ ويعالج الشيخ اللى بقاله شهرين بيقول هاتولى راجل ومخفش ثم أن اى قرار هيدعمه الدكتور ياسر القرار ساعة صدوره ؟ وإلا القرار ساعة إلغاؤه ؟ 3- وحينما يهل علينا القاضى الجليل وزير العدل متباهياً بتعيين ابنه مستشار فى قطر براتب 100 موظف حكومى أعتقد ان الاجابة هتكون .. وايه يعنى لما الراجل يعين أبنه عند الكفيل . طب بزمتك لو أبوك رئيس حى مش كان هيديلك رخصة تسرح بعربية بطاطا لا .. لا بلاش بطاطا أحسن تأخذ رصاصتين بالخطأ .. مشيها عربية تين .... إذن ظلمنا الراجل وطلع التعيين "دونت ميكس" . 4- فى مليونية نبذ العنف أرى وجوه قد خرجت من السجن بفضل عفو مرسى وكانت تهمتهم القتل العمد .. والسؤال : الآن هو إسقاط نظام فاشل بمظاهرات بتسموها عنف ولما أنتوا حاولتوا إسقاط مصر بالكامل برصاصكم القاتل تسموه ايه (بوس وأحضان) أعتقد أن دعوة نبذ العنف من أشخاص لم يمارسوا إلا حاجتين : الفشل والقتل ده أبو الميكسات كلها . 5- عندما يصرح كبير الأطباء الشرعيين بأنه لا تدخل مطلقاً من السلطة الإخوانية التنفيذية فى عمل الطب الشرعى وأن مقتل الشهيد كان نتيجة حادثة عربية .. وكان ناقص يقول أنها كانت "ماتسوبيشى لانسر" .. أحب أضيف لسيادته علشان يسبك القصة وتبقى "دونت ميكس" لازم تقول زى ما قلت عن مقتل خالد سعيد بأنه بلع لفافة بانجو يبقى الشهيد محمد الجندى لما العربية صدمته بلع "الرادياتير" . 6- هتافات امناء الشرطة (الشعب والشرطة ايد وحدة) ده ميكس مش ظابط لأن الشعب شايف أن ايد الشرطة بمباركة الإخوان على قفا الشعب ... الميكس ده بلدى اوى يا حمادة . وفى النهاية ألخص ميكس الكذب مع الحقيقة فى حكمة قديمة وهى : الفنانون يستخدمون الأكاذيب لإظهار الحقيقة ولكن .. السياسيون (الإخوان) يستخدمون الأكاذيب لإخفاء الحقيقة .