أول نهار في فينيسيا التكنولوجيا زي ما شفنا في الحلقات الي فاتت، صديقك المفضل والعزيز كمسافر، عرفنا ادوات ومواقع تساعدنا في حاجات كتير من أول حجز تذاكر السفر والاقامة وانتهاءا بتستيف الشنطة، فاضل حاجه مهمة جدا، فاضل نعرف معلومات بقى عن البلد اللي رايحينها، برنامج الرحلة، هنزور ايه؟ الأماكن الحلوة اللي لازم متفوتهاش، المتاحف والمزارات، الأكلات الشعبية، المطاعم، الشوبنج، الميادين... إزاي تحضر برنامج لطيف؟ والأهم بقى، إزاي تاخد أحسن أسعار على اللفة الحلوة دي؟ بص يا سيدي، فيه شوية مواقع انترنت عظيمة جدا كمصادر معلومات للسفر وأدلة و خرايط... عندك stay.com - priceoftravel.com - budgettravel.com - fodors.com - tripadvisor.com ومواقع تانية كتير أوي، هنتناول النهارده موقعين مهمين منهم، ولاحقا هفرد للمهمين منهم مقالات كاملة أشرح لكم فيها مميزاتهم و المعلومات اللي تقدر تجيبها منهم... *** Stay.com موقع في غاية اللطف، بيقسملك المزارات والمتاحف والمطاعم إلخ إلخ حسب المدينة، وانت بتختار انك تضيف اللي يعجبك للدليل بتاعك، وفي النهاية بتكون دليل سفر للمدينة اللي انت مسافرها خاص بيك انت، ومتاح على موبايلك، وأوفلاين وبالخرايط، ومش بس كدا، ممكن تدعو حد ويبقى انت ورفيق سفرك معاكم نفس الدليل، وببلاش!.. اتفرج على الفيديو دا عشان تعرف اكتر: http://vimeo.com/staydotcom/how-it-works وميزته إنه مش بس كدا، الموضوع تعاوني، فهتلاقي مبدئيا guides لناس تانية جاهزة ممكن تستعين بيها أو تاخدها على بعضها. وهاخدكم في رحلة سريعة جدا في الموقع وازاي تعمل أول دليل سفر خاص بيك ! فلنبدأ بالعزيزة روما مثلا، في الموقع هتكتب Rome هيفتحلك صفحة المدينة الأزلية وهتلاقي في أول الصفحة تقسيمة بالشكل دا: وهنا هو مقسم لك الأشياء اللي ممكن تعملها لأوتيلات ومطاعم، highlights يعني مزارات مينفعش تفوتها، neighborhoods وهي الاحياء والمناطق السياحية، things to do، وهناك الاختيار اللطيف Friends، لما تدوسوا هيطلعلك زرار يقترح عليك تخش بأكونت الفيسبوك. منها هيوريك أصدقائك اللي راحوا ايطاليا وبيسمحلك تطلب اقتراحاتهم! قررت أختار highlights، ولو بصيت على الصورة، هتلاحظ إنه طلع لي أسماء الأماكن الشهيرة وتقييمها.. وفيه اختيار add to guide، وهتلاحظ إن منهم 2 أنا دوست عليهم فعلا وضفتهم لدليلي، اللي هتلاقيه على ايدك اليمين، قلّب في الحاجات زي مانت عايز واللي يعجبك دوس عليه وضيفه لدليلك، ولما تخلص، دوس View guide: هتلاقي اختياراتك، ولينك للدليل وامكانية إنك تشيره أو انك تدعو ناس تانية للguide! مش بس كدا!، جرب تدوس على Map: هتلاقي أماكنك على الخريطة، تقدر تحفظ الخريطة دي وتشوفها أوفلاين، لازم تنزل برنامج الويبسايت على موبايلك! لازم! متوفر للآيفون والاندرويد... ودي هدية لطيفة للقراء: دا الدليل اللي انا عملته لنفسي قبل ماسافر روما: http://www.stay.com/s/ioLp/ ملحقتش أزور كل اللي فيه، أتمنى انت تلحق... *** موقع تاني عظيم وبحبه جدا ويمكن من أكتر المواقع اللي استخدمتها في روما بالذات fodors.com ودا من أشهر مواقع السفر حول العالم بشكل عام... وهتلاقي فيه كمية معلومات خرافية !، طباع أهل البلد، tips عن تلبس إيه واتيكيت البلد وطباع ناسه، امتى تروح وتوفر ازاي وكمية وهمية من المعلومات المفيدة جدا! الويب سايت مليان أقسام في غاية العظمة هستعرض معاكم فيها أقسامي المفضلة، والأقسام اللي بتميزه عن أي موقع تاني: قسم Fodor's choice، ودا "الزبد"، خلاصة الخلاصة اللي الويبسايت مختارهم لك واللي مش هتندم لو جربتهم، سواء مطاعم، مزارات، متاحف، ميادين، لو وقتك قليل، اختار من دول هتروح فين: قسم عظيم تاني مش هتلاقيه بسهولة متجمع كدا هو Travel tips: معلومات عن تبلس إيه وتروح فين، العادات والتقاليد والمواصلات والسفر وأحسن وقت للخروج وأهل البلد بيروحوا فين!.. والجزء الأخير اللي متأكد إنه هيعجب القراء جدا، وهو جزء الitineraries: ودي كلمة معناها مسارات السفر، عبارة عن اقتراحات لرحلات كاملة، زي اللي فوق مثلا «رحلة 14 يوم» مترتبه كاملة بتفاصيلها بمزاراتها بأكلها بشربها بتطلع منين وتروح فين، دليل جاهز لرحلة على بعضها هيفيدك أوي في تحديد رحلتك أو ممكن تاخد واحد جاهز تمشي عليه على طول!.. من ألطف أقسام الويب سايت.. *** وآخر موقع حابب أتكلم عنه النهارده ومحدش بياخد باله منه أبدا في القصة دي، موقع الهوستلز الشهير hostelworld.com لو دوست هنا، هتلاقي إنه عامل قسم لدليل السفر عظيم جدا، وعظمته بتكمن من إن دا لأنه سايت سفر شباب، الدليل بيكون لوكال، وفيه معلومات مميزة من ناس محترفة سفر وأهل بلد بجد، فيه الاماكن اللي متعرفهاش الناس التانية.. *** متخافش تجرب أي حاجه، التجربة الحلوة هتبسطك والتجربة الوحشة هبتقى قصة مسلية تحكيها لأصحابك لما ترجع (عن تجربة)... لو عندكم مواقع ومصادر معلومات للسفر شايفينها تستحق الذكر والمعرفة، شاركوني بيها في الكومنتات !
تابعوني على تويتر: http://www.twitter.com/NourEldin_z3r0 تابعوني على فيسبوك : http://www.facebook.com/ze3r0
لو عندكم مواقع ومصادر معلومات للسفر شايفينها تستحق الذكر والمعرفة، شاركوني بيها في الكومنتات !
تابعوني على تويتر : http://www.twitter.com/NourEldin_z3r0 تابعوني على فيسبوك : http://www.facebook.com/ze3r0
