بقلم الشاعرة ضحى أحمد الباسوسي صورة وذكريات عن الصورة اللي تحس فيها بالحنين... الصورة اللي تجمع طفولتك... مراهقتك... ولاد حارتك...و بنت حتتك... الصورة اللي لما عينيك تقع عليها.... تحس فجأة بالدموع و هما ماليين عينيك... متبقاش عارف ساعتها...اذا كانت دموع فرحة.... و لا دموع فراق لأشخاص معينين... و ما تحس بيهم غير و هما على خدك نازلين... صدقني حقيقي مش فارقة...لان في الحالتين... ملهاش غير معنيين...الدفا و الحنين... دفا الايام الحلوة...ولمة أهلك و قرايبك... و الحنين للسنين...اللي نفسك في يوم تعيشها من تأنى ...بس بالتصوير البطيء... عن الصورة اللي فيها أول حركة ليك... عن الصورة اللي تتاخد على سهوة... و نكون بجد فيها مش دريانين... عن الصورة اللي أول ما تقع في ايدك... تملى القلب شوق و حنين... عن الصورة اللي انت فيها مع صديق عمرك ... و تسرح فيها و تقول ايه اللي حصل ... ما احنا كنا كويسين... عن الصورة اللي مركونة في البوم المنسيين... عن الصورة اللي منورة فيها ضحكتك... يبقى ليها مليون فهم و مليون معنى... بس انت الوحيد اللي تبقى عارف ساعتها...اذا كانت بس حقيقة و لا خدعه اذا كانت... مجرد هروب... و لا تبقى بجد من القلب طالعة... عن الصورة اللي انت فيها طاير من الفرحة... صورة باينه للي حواليك حلوه... بس من جواك تبقى على الجرح دايسه... و تقفل الالبوم و تقول في سرك... اهي أيام و عيشناها...و لسه بنعيشها.. بحلوها...بمرها...اديها بتعدي...و احنا لسه فيها مكملين ضحى احمد الباسوسي
