الدموع فكت لجام العين و هربت تفتح القبر اللي دافن فية الحكاية تنتفض ذرات غبار الذكريات وترسم تفاصيل الحكاية علي كل جدران معبدي يتمد منها خيط حزين يوصل ما بين حوشنا الكبير وبين ضلوعي اللي يومها عملتها سلم بيوصل للسما لاجل ما اوصل ليكي واقدر المسك وانتي قاعدة ع القمر بتغزلي النظرات شباك وتحدفيها ترسم في صدري شكل قلب تلميذ جديد لسه بيرسم ف الحكاية حبة خطوط متلخبطة لسه بيتعلم يفك لك ضفيرة قلبك المربوط بخوف وتطير مشاعرة في الهوي واحنا راكبين فوق حصانا الحلاوة تمدي ايدك جوه قلبي تنعكشية وتعدلية وتعلمية يستهجي الحروف اللي ف عيونك لما بنغافل العيال و نستخبي في ضل صفصافة هوانا يصحي جدي علي همس صوتنا من ضجه اصوات القلوب لما بتعلي بالهوي نخاف و نجري وايدنا حاضنة بعضها ينده لنا و يقول صحيح بتحبها اعمل لها قلبك سفينة والرموش مخده ليها ومروحة وافرد لها منديل ورق فوق البحور مستحيل يوم ينقطع و يغمز بعينه يطمنك ده واد جدع ويومها قولتي هسحرك تمثال شموع حزمتي موج البحر ورقصتي معاه من كتر غيرتي دخلتي و ياكي في تحدي ان اشيل الكون بحاله فوق صباعي شلته بيكي دورت بيكي لاجل ما اكسب بس نظره او تقولي حبيبي اصله واد شيطان كرامات هواه عدت حدود المستحيل كنت قادر الضم نجوم الكون بحاله حبات في سبحة حبي ليكي وكنتي قادرة بنظره واحده توقفي بينا الزمان وانا بين ايديكي طاب اية حصل؟ ازاي بتقولي اللي بينا كان يادوب لعبة عيال وان العيال لما بتكبر مش بيفضل منها شئ ما تساويش الذكريات ازاي كدة باسهل سهولة تربطي حوالين مشاعري المشنقة دانا قلبي كان معمول عشانك شرنقة ليه تسمحي للشمس تغرق في الغروب لية تهدمي علي قلبي اسوار معبدي وبنيتي بينا الف سور لية الغرووووووووووور ؟ دانا لاجل ما انسي كلبشات حبك في قلبي بعترت قلبي علي الطريق ودفت اخر نبض فيه جوه قبر قديم قديم لولا الدموع كنت حالف ما افتحه ولا مرة تنقاد له الشموع