صوره 1 عيال م الحاره ملمومه حدفاهم ليالي المر علي الكوره و هناك علي هامش الصوره ولد نايم يداري احساسه بالغربه في شكل جنين صوره 2 علي تخته يجتمع اتنين فيبقوا اصحاب علي الاخر بيتقاسموا الكلام والصمت وحجاب سرهم مفضوح قطر الدنيا بيزمر و يبعدهم و يبقوا يادوب حرفين في نوته منسيه لاشباح عاشت علي الميه صوره 3 نداهة الغربه بتنادي ولد عادي تزغلل عينه بالتلاليس يلم همومه جوة الكيس و يسافر لعين الشمس تحرق مهجته و يده يعود وحده بنفس همومه جوه الكيس صوره 4 زفه و ناس بتجمع علي الزغاريط وحد عبيط بيدسه ف ركن بعيد بيراقب دمعه مدارية علي الكوشه ف عين البت اللي بتحبه وغصب عنها تتجهز لحد غريب اختارها علي الفرازه وسط الوف صوره 5 تدق الحضره وبتضرب طبول الزار يقوم محتار وقت الفجر ما يشقشق يصحي في قلوب الناس حلم جديد والدنيا في عز الحر بتمطر عليه برصاص قدامه اصحاب بتترمي الدم يغطي ملامحهم فيعود منصور حلمه الصوره تتغير و يزرع علي الطريق احلام تعوض غيبه الاصحاب صوره 6 شياطين بتكسر البرواز تفضي سمها وتشرب (بواقي الحلم) م الرصفان يفتح صدره وبينوي يصلي الفجر ف الجنه وعلي وشه ملامح بسمه مش اعلان اكمن الرؤيه اتسعت و وصل لنهاية المشوار باخر صوره م الالبوم ملحوظه ما بين القوسين اسم لقصيده لصديق في نادي الادب بأسوان ورغم ان قصيدتي بعيده عن قصيدته إلا اني اقتبست هذه الصوره منه لانها تخدم المعني
