كتب - فرشوطى محمد - يكونشي السيسي هو اللى بيرمى الزبالة ... وبيكسر اشارة المرور فى الشوارع ...وبيغش فى السلع ، وهو اللى عامل فوضى المرور وضيق الشوارع وكثرة السيارات ،وجايب الأمراض والكوارث الاجتماعية للشعب ،ولا يكونشي بيقعد يحقن الفراخ البيضا علشان يسمنها ويبعها لنا زى لحمة الحمير والكلاب ... ويرش الخضر والفاكهة بالكيماويات والهرمونات اللى دمرت كبدنا ؟؟ ولا يكونشي هو سبب تخلف التعليم وبيمنع الطلبة من البحث المعرفى ، والحوار ، وتبادل الإراء ،واحترام الأخرين ،وقبول النقد بسعة رحب.ولا يكونشي السبب وراء انتشار الدروس الخصوصية،والتحايل والالتفاف حول القانون؟ ولا يكونشي ياعم فرشوطى هو السبب فى العنف الجسدي والفقر والتفرقة العنصرية والتحرش ...والكبت ... والجهل ..والفقر ..والمرض ؟. ولا يكونشي بنى له قصر وضع يد وتاجر فى الاراضى اللى ملك الدولة وكسب ملايين من تجارة الاراضى والمخدرات؟ ولا يكونشي هو اللى بينزل الملعب يجعر مع جمهور الأهلي والزمالك والمصري وغيره ، و يستعمل العصي والصواريخ والشماريخ ؟ ولا يكونشي السيسي هو اللى علمنا عدم تحمل المسئولية والتواكل ،ودمر مصر ونهب أموالها واستنزف مواردها وجاب الإستعمار واحتل فلسطين !!، ولا يكونشي هو اللى خرب عقولنا بالخرافات والخزعبلات.والثعبان الاقرع وأبو رجل مسلوخة ،وترك الأفاقين والمنافقين يعبثون ويتاجرون بعقول الناس باسم الدين.وزرع بذور التطرف والحقد والكراهية والرشوة والمحسوبية .؟ ولا يكونشي هو سبب المبانى المخالفة والعشوائية والرجال البلطجية و الراقصات والمخدرات . وبرامج الفضائيات المضروبة ، واعلامى السبوبة والمصلحة والصراخ بالصوت الحيانى وكأننا فى «كباريه اللاسع والملسوع» الظاهر احنا فى مولد سيدى الملطوش ومش عارفين ان العيب فينا ولا عارفين احنا رايحين فين ولا عايزين أيه!! وللحديث بقية. فرشوطى محمد صحفى وكاتب ساخر
