سجن المكان ما يهمنا .... سجن اللسان اصعب لنا متصدقيش اني ضعيف ..... اذاعتنا كانت مش لنا حلمي انا مش في الرغيف ... حلمي تكوني ملكنا متصدقيش اني جبان .... ده احنا الرجولة في دمنا لما المظاهره تلمنا ....... حيبان ساعتها اصلنا فرحك اذا كان في الميدان ... حارقص واغني لك غنا متسمعينا ضحكتك ...... خلينا ننسى همنا قالوا عني احبك من زمان ..... طاب مانتي برضوا حنينه رجع البطل يركب حصان ...... بعد الغياب تلاتين سنه رجعت طيورك للغيطان ..... لما الصباح زار ارضنا حاكتب على سور الميدان ... ان التاريخ فات من هنا ارسي على بر الامان ..... وارمي القلوع على شطنا تعب الهوا شراع مركبك .... لما هجرتي بحرنا غربتنا كانت في الوطن .... كنا بعيد واحنا هنا طول عمرنا بينا اتفاق .... وانتي رضيتي بشرطنا احنا نعيش جوا الوطن ..... وانتي تعيشي في قلبنا