( بسم الهوا ) بسم الله بسم الهوا وباسمك أنتي لجل تحلي البسملة والاستعاذة من الشيطان ومن الكلاب الضالة والناس المملة وم النفوس المخزلة ومن عيون الحاسدين وكل من شاف القمر فرش الحنين فوق الندي ولسانه مذكرش النبي ولا رطبه بذكر الصلي ده المبتدي وكل شيء له أوله حتما يكون له تكمله وانا قلبي بالحب إتملي فايض علي الجنبين وبيكبكب غرام يام الكلام والشعر يا أم الضي في عيون الضلام انا جاي بتقدم يا ريتك تفتحي باب الحنين وتريحي قلبي المحب بكلمتين دانا جاي بقدم خطوة وارجع خطوتين هل تقبلي مستقبلي وعمري اللي جاي وقلبي مهر ورموشي همه الدبلتين هاتي إيديكي والبسي ف أيدك اليمين دبلة من الشوق العقيق والحب والأمل الرقيق وفريق من الإحساس يهاجم وبحماس يترجي كاس الحب في نظرة رضي وفي أيدك الشمال مشبك وكام خاتم دهب متطرزين بالماس وأنفاس اللوقي وحرارة الواد الشقي يالله الحقي قلبي المتيم في إنصهار دانا بعشقك يا أم النهار طارح بلح فوق النخيل أنا قلبي نيل جايلك يصب الحب في بحر الهوي قلبي غوا فصنعت من صدري الجريح عش السعادة وقلبي نادا وكل يوم عمال يصيح الريح بتاخده ناحيتك وتلفلفه وتدوخوا وبتقلعوا ترميه علي شط الوجع يلقي في عنيكي النيل نقص ياخده الزعل يتقمص ليل الشتا يرصرص ف يشعر بالسقع ويلف في الكون الوسع ما يلاقكيش يرفض يعيش إلا مع قلبك وعينه مدمعا يرفض يضيع يفتح لحبك سكة تانيه من جديد ومن جريد الصبر يصنع مركبا يملاها بخيوط الأمل يركب عليها لجل ما يجلك بطل ويكمل النهر اللي ناقص من دموع حزنه اللي جارف ويعلي منسوب الآمل وفي عمره ما يخالف معاد مانتي المراد وأنتي الحياة وأنتي فات وأنتي الممات وأنتي الأجل قطر المودة اللي سحب م ع رصيف أنتي الشعور بالنسمة في عز الخريف وأنتي وليف طير الغرام اللي أنهجر ف العش وأنتي شروق الشمس ف أيام الشتا والوش وايدين القدر يا مهد أحلام الصبي أنتي النبي وأنتي الرسالة فاكتبي من فوق سطور العشق اسمي وواهبي ليا الحياة يا صوت آذان الفجر في الزمن العصي قومي ارقصي ويايا علي طبل ونغم خليني أحس إني ملاك في جنة مليانه بشر خليني أحس إني بحس واني بحب وليا قلب مش حته حجر -------- رابط القصيدة على اليوتوب http://www.youtube.com/watch?v=sqY8F7kW7Mc ---------------- ايميل الشاعر [email protected]