إنتشر في الفترة الأخير فيلم قصير بعنوان " أين ودني" والذى يحكي موقفا بين شخص ليبرالي وشخص سلفي، تعرفا على بعضهما في ميدان التحرير، وقرارا أن يصبحا أصدقاء، يبرز الفيلم الصور النمطية الموجودة في ذهن كل منهما عن الآخر، وهي الصور التي يظهر في الفيلم أنها غير صحيحة، المفاجأة أن بطلي الفيلم، الليبرالي والسلفي هما في الحقيقة شقيقان ، وفي الحقيقة مثل الفيلم، واحد ليبرالي والثاني سلفي ! . يقول مخرج وكاتب وبطل الفيلم عزت أمين : أعمل في الاعلانات ، اشتغلت شوية في التمثيل وقمت بدور شامبليون في فيلم ورقة شفرة ، كما قكت بدور في فيلم أعز أصحاب، وأكتب سيناريوهات ومقالات ، وأشهر مقال كتبته عنوانه "حزب الكنبة" والذي تحول إلي مصطلح سياسي متداول حالياً . عزت يقول عن فكرة "أين ودني" : اللي حصل بعد الثورة إن كل الناس بدأت تتخانق مع كل الناس على كل حاجة، الموضوع تحول لسيرك، كل الناس تتكلم في كل حاجة وتتهم بعضها في كل حاجه وتركوا المشاكل الكارثية اللي داخلين عليها، لقيت مانشيت إن مش عارف مين ..قطع ودان مين علشان بيطبق الشريعة، وكأن الشريعة فيها قطع ودان، وقرأت ان السلفيين بيهدموا الاضرحة و يشترون سلاحاً والشيعة يهددون بالرد عليهم، وشفت ان ده تهريج، منذ متى والسلفيون يشتروا السلاح ، وفي نفس الوقت وجدت شيخاً يقول ان الليبرالية هي " إن امك تقلع الحجاب " ، فأنا مش متخيل ان شاب نزل ميدان التحرير ووقف قدام دبابات علشان يقلع أمه الحجاب .. قلت طيب ايه الحل؟ انا أعرف أعمل إيه؟ اكتب امثل واخرج، ده اللي اقدر أوصل به للناس ، وأخويا أصلا سلفي وطلع معايا في الفيلم وكنت شايف اللي بيحصل له، كان لما ينزل وسط البلد في الأيام العادية لازم مخبرين يوقفوه ويسألوه رايح فين.، فأنا كنت شايف انهم اتعمل فيهم بلاوي من أمن الدولة، وفي نفس الوقت الاعلاميين بيصوروا انهم هياكلونا، في نفس الوقت السلفيين بيستخدموا خطاب غير مناسب، السلفيين لا يجيدون استخدام الميديا، ماكانوش بيظهروا في الاعلام لأنهم كانوا مقهورين ومابيعرفوش يوصلوا صوتهم حتى لو عندهم حق. ويتحدث عزت عن فيلمه ويقول: الفيلم اسمه " اين ودني" يعني قبل ما نتكلم نسمع، لما تتصور ان صورة السلفي هي إنه واحد طالع من فيلم أبيض واسود ولابس جلابية وشايل السيف فده كلام فارغ، وان السلفي متصور ان الليبرالي طالع من نفس الفيلم ولكنه قاعد مع أبو لهب وحوالية الجواري فهذا كلام فارغ، فبدل ما اعمل فيلم عن السلفيين قلت اخلي السلفيين يعملوا فيلم احسن، ويعبروا فيه بطريقتهم، وكانت كل مهمتي هي قيادة الفيلم. سألت عزت عن معنى ما قاله .. فأكد أنه لم يتدخل في الأحداث التي تضمنت السلفيين في الفيلم وإنما تركهم يكتبونها بأنفسهم، وعن خروجها بشكل كوميدي قال أنهم من اختاروا ذلك، فهم لم يسخروا من أحد، لم يسخروا من الليبراليين كما لم يسخر الليبراليين منهم، وأيضا قصدوا أن يوضحوا رسالة مهمة، أن السلفيين لم يكفروا من قالوا لا في الاستفتاء، هناك استحالة في المنهج السلفي ان يكفروا أي أحد ، مضيفا: ميقدرش لأن ده ضد منهجه، انت شفت حتى في الفيلم ان السلفي علشان ينزل ميدان التحرير طلع الكتب علشان يتأكد من مشروعية نزوله، وفي نفس الوقت انت كرجل ليبرالي ماينفعش تقول انك تؤمن بالحريات للجميع ماعدا التيار الاسلامي، ده كلام فارغ، أنا قصدت أن أوضح هذا .. كما قصدنا الرد على من أنكروا نزول السلفيين الميدان، وذكرنا بالأسماء الشيوخ اللي نزلوا من غير فتاوى لميدان التحرير علشان يقطعوا الشك باليقين ومنهم الشيخ محمد عبد المقصود لأنهم اعتبروا ان نزولهم يندرج تحت فقه الواقع. وعن وجود خلافات بينه وبين أخيه بسبب أن أحدهما سلفي والآخر ليبرالي قال ابراهيم : خالص مفيش اي حاجة من دي، خد بالك ان اي خلاف هو في منطقة صغيرة جدا، محمد حسب فكره السلفي فهو يحرم المزيكا، وأمي حل من اثنين، يا إما اقعد انا وهو نتكلم عن المزيكا ، أو لما يجي لا أشغل مزيكا ! .
