شنت صفحة "قوائم العار" هجوما على الفنان تامر حسني الذي تم تسجيله فيها ضمن مجموعة من المشاهير الذين كانوا لهم آراء ضد الثورة في بداياتها.. وقد عبرت الصفحة عن انتقادها ل " تمورة " من خلال رسالة ساخرة بثتها لأعضائها الذين قاربوا على 25 ألف عضو . كان نص الرسالة هو " تموره عرف قد إيه هو كان غلطان في حق الشباب وانه أتغرغر بيه من المسئولين وانه ندمااان قوي قوي علي الموقف اللي خده من الشباب وقلبه بيتقطع وكل يوم يفتكر الشهداء ويعيط ويا عيني بقي علي عذاب الضمير الصاحي وكل همه وندمه علي الغلطة اللي غلطها دي ومش مهم عنده شعبيته وحفلاته وشرايطه والشهرة الزيادة اللي هيموت عليها كل ده مش مهم هو مستعد يتنازل عنها قصاد عذاب ضميره وانه يستريح.. كل الكلام ده تموره مقالوش بس.. الواد عمل فعل هو مش بتاع كلام الواد قرر يطلع أهالي الشهداء عمره علي حسابه الخاص وأعلن ده في كل حته عشان الناس كلها تعرف هو قلبه بيتقطع قد إيه.. يا تري الناس كلها عرفت أن تامر هيطلع أهالي الشهداء عمره ولا لسه؟ اصل لو لسه هيبقي اللي بيفكر فيه تموره لسه محصلش.. يا تري إيه الي بيفكر فيه تموره؟". وقد أعادت صفحة كلنا خالد سعيد تناول الحديث حول الشخصيات العامة التي كانت لها آراء ضد الثورة ، وذلك حينما بثت اليوم رسالة تقول فيها "كم المغالطات الإعلامية والتضليل اللي حصل للناس اللي بتتفرج على القنوات الأرضية والفضائية المصرية كان غير طبيعي .. الإعلام المضلل كان هدفه تشويه صورة الثورة وتسبب في النهاية في قتل المئات من المصريين المخلصين .. بعض الشباب اللي نزلوا يهاجموا متظاهري التحرير قالوا إنهم راحوا يضربوا العملاء اللي عايزين مصر تحتل.. لازم كل إعلامي أو شخصية مشهورة شارك في صناعة الرعب ده يتحاسب.. أو على الأقل يسيب دوره لمن هو أقدر منه"، وقد نشرت الصفحة أيضا رسالة تقول فيها " صفحة "كلنا خالد سعيد من بدايتها تحترم آراء أعضاءها.. عايزين كل الناس اللي بتحب الصفحة وشايفين إن ليهم رأي في التوجه اللي المفروض الصفحة تأخذه يشارك معانا بأفكاره ويصوت على الأفكار اللي اقترحها الأعضاء التانيين.. الصفحة من أكبر الصفحات المصرية وفيها مليون مصري.. عايزين نسمع صوت الناس وننفذه زي ما أتعودنا من أول ما الصفحة أتعملت .. يا ريت كلكم تشاركوا بأفكاركم وتصوتوا على أفكار الآخرين" وقد قام وائل غنيم بعمل صفحة على موقع جوجل لجمع الاقتراحات وبالفعل وصلت له الكثير من الاقتراحات للصفحة والتي كانت في معظمها تتجه نحو وجوب أن تقوم الصفحة بدور كبير في مجال التوعية السياسية والثقافية لأعضائها. ومن ناحية أخري .. أعلنت الصفحة الرسمية لرئاسة مجلس الوزراء المصري عن قرار محافظ حلوان بدعم كل طالب وطالبة من أبناء مدينة الصف واطفيح ويتمتع بالإقامة بمدينة الطلبة والطالبات بإمبابة التابعة لمحافظة الجيزة ب 250 جنيها سنويا وفقا للأعداد المتقدمة والفعلية من حساب صندوق الخدمات والتنمية المحلية.. كما قرر المحافظ اعتماد مبلغ 47 ألف جنيه لعدد 188 طالبا وطالبة من أبناء محافظة حلوان المقيمين بمدينة الطلبة لهذا العام.
