مشوار طويل ومختلف قطعه هذا الفنان الكبير.. لا يهم الكم سواء سنوات الأحتراف أو عدد الأفلام التى قدمها ، لكن المثير للإعجاب هو الكيف .. فلا يوجد دور تقريباً إلا وقام بتجسيده بنجاح وتمكن وموهبة لم يختلف عليها أحد ، ولأنه قليل الظهور إعلامياً وحواراته الصحفية معدودة ، فنحن لا نحتاج لمقدمات أكثر من ذلك ، تعالوا نسمع محمود عبد العزيز .. كثير من الممثلين ما يصنعون شخصية مختلفة لهم ليظهروا بها أمام الناس ، كيف حافظت على شخصيتك بطبيعيتها وعفويتها؟ معرفش.. بس أنا كده عمري ما حاولت أضحك على نفسي.. بعض الزملاء يقولون أنا عملت الفيلم ده علشان أكافح التلوث.. عملت الفيلم ده علشان مش عارف إيه.. لأ إنت مقولتش حاجة لأن ده فكر المؤلف.. أنا قرأت اللي كتبه المؤلف وممكن مايكونش موافق لميولي السياسية لكني معجب بالتركيبة فأعملها.. لما ينجح الفيلم مش أنا صاحب الفيلم أبدا، بالمناسبة، أنا عمري ما حسبتها في أي حاجة في حياتي.. ولكن إنت إزاي قدرت تستمر؟ عمري ما حسبتها.. أحكي لك على حاجة : زمان كان فيلمي يتحط أول أسبوع يعمل إيرادات جامدة جدا وبعدين ينزل فيلم تاني فيحطوا فيلمي في دور عرض قليلة والتاني يتحط في أكثر من ضعف دور العرض التي يعرض فيها فيلمي.. فكان طبيعي إن الفيلم الآخر يجيب فلوس أكتر مني.. رغم ان لو حسبتها هتلاقيني جايب أكتر منه في أول أسبوع.. الحاجات دي كانت بتستفزني في البدايات.. فكنت أكلم واحد صحبي مغرم جدا بالسينما وهو كان خريج زراعة فقلت له أنا بفكر أبطل ..فقال لي أوعى .. انا ياللي مبفهمش بشوف من بعيد بلاقي "نقر" قد كده قدامك وأقول هتقع فيها وألاقيك تروح معديها، أنا قدري جدا.. لا حيلة في الرزق ولا شفاعة في الموت كلمة حاططها قدام مني . أكتر فيلم اتكيفت وانت بتعمله؟؟ الكيت كات وبعدين كان جوايا كمحمود عبد العزيز إني كان نفسي في دور تراجيدي، ولما كان حد بيسألني عن الشخصية دي واستغرق في الإجابة كنت ممكن أعيط.. عينيه تدمع. فضل عايش جواك شوية بعد الفيلم؟؟ كتير.. وبعدين ايه قوة الرجل ده؟؟ إيه الجمال ده؟؟ إحنا شايفين كل حاجة وبصحتنا ومعندناش قوته.. شخصية بصراحة وقفت عندها كتير قوي . نفسك تعمل ايه؟؟ بص انا مالياش طموح معين لأني لو فكرت في حاجة ووصلت ليها هكون انتهيت.. أنا بس بتمنى طول ما ربنا مديني القدرة على الخياة إني أقدم أعمال فيها فكر وبهجة للناس.. مش هقولك غني نفسي أعمل هاملت أو بجماليون.. لأ بس أنا نفسي أعمل أحسن من كل اللي عملته قبل كده. وعاوز أقولك على حاجة: الفن مسئولية كل فنان زي مال التدخين مسئولية كل مدخن.. أنا ممكن أقعد سنين ما اشتغلش طالما مالقتش حاجة كويسة.. عارف السنوات اللي مشتغلتش فيها؟؟ والله لفيت فيها أجمل بلاد العالم وأقعد مع ناس سياسيين ونجوم وسفراء وشفت الدنيا.. الناس اديتني اسم "محمود عبد العزيز" فمينفعش أعملهم أي حاجة كده, أنا الحمد لله معايا فلوس وولادي كبروا وبيشتغلوا فيعني هاخد إيه؟؟ أيوه البحر يحب الزيادة وكلنا لينا أطماع بس أنا مايينفعش أخون الناس.. يعني مفيش دور معين اللي نفسك تعمله؟؟ بص نفسي أمثل لغاية ما حياتي تنتهي.. أكيد لسه في أدوار معملتها وعاوز أقولك إني لغاية دلوقتي كل ما أدخل فيلم بحس إني أول مرة همثل وبيسيطر الشعور ده عليه خصوصا لما أكون بقالي فترة بعيد عن التمثيل. بس اقولك حاجة؟؟ أنا نفسي أعمل شخصية من التاريخ الاسلامي.. مش شخصية محددة.. لأ .. المهم تكون شخصية عظيمة ومؤثرة. ما رأيك في عرض الأفلام المصرية في كان وما يقال إن كل ده من باب المنظرة لأنها لا تعرض في أي اقسام المهرجان؟؟ ماتبصلهاش كده.. ده شيء إيجابي.. أيوه الأفلام بتعرض في السوق التجاري للمهرجان.. لكن في نفس الوقت دي محاولة للاقتراب منهم.. زمان فضلنا خمسة عشر سنة أفلامنا تعرض في المهرجان وبعدين توقفنا لأن حصلنا تراجع في حجات كثيرة.. المحاولات اللي بدأها عماد أديب بدأت تعمل صدى على الأقل أثر على التوزيع الخارجي للفيلم. نقدر نقول إن "ابراهيم الأبيض" كان أول مشاركة لك في سينما الشباب.. رأيك إيه في تجربة مشاركة النجوم الكبار الشباب في أفلامهم؟؟ أنا مش مؤمن بالكلام ده وسينما شباب وسينما مش عارف إيه.. في حاجة اسمها السينما، لما بدأت العمل في السينما كان موجود جيل العظماء وكان فخر لي أني اشتغلت معاهم وحصل بين جيلهم وجيلنا "سلم واستلم" بهدوء ومن غير ما حد يتكلم عن سينما شبابية ولا عن وقوف فلان جنب فلان.. دي سينما.. في السينما العالمية المسميات دي مش موجودة ، وفي مصر النجوم الكبار بيشتغلوا وماعندهمش موانع ولكن المهم هو ايه الشغل ده.. مش معقول بعد العمر ده نعمل فيلم نص علشان نقف جنب السينما الشبابية!! بمناسبة حديثنا عن النجوم الشباب.. إيه رأيك فيهم؟؟ لسه مانقدرش نحكم على تجربتهم.. التجربة مازالت في بدايتها.. عارف قصة القروي الذي قدم للمدينة وبهرته أضوائها فكان كلما رأى شيئا أحمر قال أنه صندوق البريد؟؟ إحنا محتاجين وقت علشان نقدر نشوف هل يستطيعون الاستمرار وهيبقوا نجوم بجد ولا هيكونوا مجرد صناديق بريد.. وده مايمنعش إن هناك في هذا الجيل أفلام كبيرة تعرض في المهرجانات وذات قيمة فنية.. لكن كمان فيهم نجوم قال لي عنهم الله يمسيه بالخير وحيد حامد وصف عجبني جدا " النجوم دول عاملين زي عيدان القصب.. المنتج بيمسك الواحد فيهم ويعصره لغاية ما يجيب أخره فيرميه ويمسك غيره". علشان كده بنلاقي إن أغلبهم بيشترط أجور عالية جدا في أفلامه بمنطق "ألحق اللي أقدر عليه قبل ما العصير ما يخلص"؟؟ والله أنا بستعجب من الأجور دي.. عارف أنا لما كسرت الدنيا في فيلم الكيف كان أجري كام؟؟ ستة آلاف جنيه وكنت في الفيلم اللي قبله عملت إيرادات كويسة وكان أجري أربعة آلاف جنية ولما جه فيلم الكيف قعدت أفكر وأنا محرج ياترى لما أقول للمنتج إني هرفع أجري ألفين جنيه هيوافق ولا لأ؟!! وكنت قلقان إنه مايوافقش.. زمان كنا بنرفع أجرنا حبة حبه وماكانش حد بيفكر في الأجور الخيالية دي.
