هو مواطن بسيط ليست له أحلام ولا طموحات.. يعيش فقط من أجل أن يكمل رسالته فى الحياة والتى تتلخص فى أن يأكل ويشرب وينام .. لكنه بعد الأحداث الأخيرة شعر بأن مصر تتغير ولذلك طالب الناس بأن "ينظفوا" تماماً مثلما تنظف مصر الآن ... حوار: محمد شعبان تصوير : محمد لطفى صابر الشيمى الكناس بهيئة النظافة بالقاهرة والذى أعلن تضامنه مع الثورة حيث يعمل طوال النهار والليل فى وسط البلد بدون أوفرتايم من أجل مصر ، ورغم تظاهر عدد كبير من العاملين بهيئة النظافة والتجميل احتجاجاً على أوضاعهم فى ظل حالة الثورة التى تشهدها العديد من القطاعات فى الدولة إلا أن عم صابر أكد أنه مش مستعجل على رزقه لأن الثورة هتغير كتير .. طلباتك إيه يا عم صابر فى الظروف دى ؟ العدل فى المرتبات .. يعنى يرضيك وأنا واحد كناس محترم ألا يتجاوز مرتبى 500 جنيه فى الشهر.. إذا كان هذا يرضيكم فإنه لا يرضى ربنا وكفاية أن أنا عندى 6 أولاد وكلنا على باب الله. طيب إيه رأيك فى تغيير النظام ؟ ربنا يهدى الخلق.. أصل الظروف زى الزفت والحالة نايمة ! طيب أنت ليه ماسك علم مصر مع المقشة؟ أصل أنا متضامن مع الثورة .. وشغال طوال اليوم حتى فى الأوقات اللى من غير شغل وبعدين أصل دول يومين لازم نقوم فيهم بواجب فى الحياة ولا يصح أن نترك زبالة مصر فى الظروف دى. ولماذا لم تعتصم حتى تأخذ حقك ؟ غيرى من الزبالين والكناسين اعتصموا وأنا بصراحة مش فاضى ووجدت أنه من المهم الآن أن أقوم بواجبى ، وإن شاء الله الثورة ستعطينا حقنا . طيب يكفيك كام عشان تعيش محترم ؟ أنا مش طماع لو أعطونى 800 جنيه يبقى عظمة على عظمة .. أصل أولادى كلهم خارج التعليم والمصاريف مش كتير قوى زى ما الناس فاكرة . طيب ليه أولادك خرجوا من المدارس؟ التعليم مش لأمثالنا إحنا آخرنا نعيش يوم بيوم ... ورسالتنا فى الحياة أن نعيش يعنى نأكل ونشرب ونشتغل وخلاص وإحنا مش عايزين نركب عربيات ولا نفسنا نسكن فى شقة فخمة .. بس أقصى طموح أمثالى أنه يأكل لقمة حلوة . ## طيب ليه هو إنت مش زى كل الناس؟ أنا مش زى الناس أنا كناس .. المجتمع لا يحترمنا ولا يتعاون معنا يعنى أبسط مثال لو الناس محترمين ما كانوش يرموا الزبالة فى الشارع لكنهم عارفين إن فيه شوية خدامين هيرفعوا وينظفوا مكانهم. طيب ماذا تطلب من الثورة ؟ إن الناس "تنضف" شوية وترحم الكناسين من المعاناة وتقلل من الاستهلاك وبلاش يأكلوا كتير علشان الزبالة تقل . وصدقنى إحنا بنتمرمط يوميا وبنشيل قرف الدنيا والمرتب برضه ثابت . سمعت عن ثروة أحد عز .. شفت عنده مليارات قد إيه؟ طبعا سمعت وشفت وأنا والله مش عارف المليارت دى جابوها منين ، ده أنا شغال كناس من 20 سنة ولحد دلوقتى جيبى فاضى وحالتى زفت وساكن فى شقة تحت الأرض مش زى البنى آدمين يعنى لو على التعب والشغل كان زمانى عندى قد أحمد عز 20 مرة. مش بالشغل يا عم صابر ده .. بالدماغ؟ قصدك بالسرقة والنهب إحنا هنضحك على بعض .. للأسف بلدك فيها حرامية محترمين كتير قوى يعنى تلاقى الحرامى يسرق ويطلع فى التليفزيون يتكلم ويلبس بدلة ويمسك مناصب ويذل فى خلق الله هى الدنيا كدة .. أصل مفيش أمانة ولا ذمة ولا ضمير ولا إحساس ولا دم . بس إنت مواطن شريف يا عم صابر؟ يا عم شريف مين أنا كناس .. سيبنى بقى أكنس !!
