في ميدان رمسيس يلفت نظر المارين شخص في حوالي الاربعين من عمره جالس في بالوعة مجاري , ومن الواضح انه يعيش فيها , لانه طول النهار بجانبها , وبالليل يكون نائما بها , واي حد يمر من امامه يسمع حكايات كثيرة حدثت معه , فهو يكلم نفسه , ويحكي قصة حياته واحداثا مر بها .. اقتربنا منه وحاولنا ان نحاوره فاكتشفنا انه مجنون احيانا وعاقل احيانا اخري .. وفي السطور القادمة نتعرف علي حكايته م تصوير: محمود شعبان * انت مين؟ اسمي ابراهيم * اسمك ابراهيم ايه؟ كان مكتوب في جواز السفر وسرقوه , ومشي بدعي علي حد ولا حاجة وسبتهم , واخدوا كل ورقي , وسرقوا المحفظة وكل حاجة . * انت سافرت قبل كده؟ اه سافرت ليبيا ورجعت , وكله ضاع وراح , الكلام ده من حوالي سنة او عشرة .. مش فاكر ! * وكنت بتعمل ايه هناك؟ كنت ببيع ملابس وأتاجر , وياما كسبت وخسرت , واهو كله رايح في الضياع . * وقبلها كنت عايش هنا؟ اه طبعا , طول عمري هنا . * طيب انت عايش هنا ليه؟ انا عايش هنا كده , ما هو ده مكاني وبيتي وعنواني , واي حد عايزني يجيني هنا , وقولوا لاي حد عايز ابراهيم روحوله هناك في البلاعة , والبلاعة دي بتاعتي , ومفيش مكان تاني غير هنا . * عايش هنا من امتي؟ من زمان والبخت مايل , واحد ابن حلال كان بيقولي كده علي طول وكان بييجي كل شوية يقولي من زمان والبخت مايل , ولما سألت عليه لقيته مات . * طيب كنت فين قبل كده؟ كنت قاعد هنا , بقالي 11 سنة هنا والبخت ضايع يا ولداه . * وانت منين اصلا؟ من هنا من مصر , ومعنديش متوة تاني غير البلددي . * طيب ايه اللي خلاك تعيش هنا؟ امر الله وظروف , واديني عايش وخلاص , بس المشكلة ان البخت مايل , امال هاعمل ايه يعني , هاروح اتغرب فين تاني , الناس بس تسيبني في حالي . * طيب بتروح فين تاني غير هنا؟ الدنيا ضيقة فمش بروح أي حتة تانية , بنام هنا وباكل هنا * مش عايز شقة؟ اه عايز حاجة احلي من هنا , بس المكان ده بتاعي برضه ومش هاسيبه , دا هنا حياتي كلها , انا هنا تمام . * طيب بتشتغل ايه؟ بمسح الجزم علشان الناس تستريح , واهو كله ماشي في الدنيا دي , وياريت اعجب بقي , اديني بمسحلهم الجزم مع اني مش اقل منهم , انا كنت تاجر قد الدنيا , بس خسروني , وخسرت اللي ورايا واللي قدامي , واشتغلت كل حاجة في الدنيا الا الممنوع , الحمد لله . * طيب انت بتكسب دلوقتي؟ الحمد الله , بس هاكسب ليه , ما هو كله ضايع , وياما صرفت , بس اهي ماشية , وعندي ضمير في شغلي بس مش نافع . * انت خسرت قبل كده؟ كل حاجة خسرتها , لكن هاعمل ايه يعني , ما هي الدنيا كده , وانا مش عايز حقي خلاص , ولا عايز اي حاجة . * سمعتك بتقول أخد فلوسي .. مين ده؟ الناس كلها اخدت فلوسي , كان معايا شيء وشويات , وكله راح . * اتنصب عليك قبل كده؟ يعني اعمل ايه يعني , ما هي الدنيا كده , وصرفت كتير اوي , ومفيش فايدة . * طيب حاولت تشوف مكان تاني غير هنا؟ لا لأن ده مكاني وبيتي هنا . * مفيش حد حاول يمشيك من هنا؟ لا طبعا مفيش حد يقدر يعمل كده معايا , لان هنا قوة اساسية , ومركز تدريب زي الجيش بالضبط , ومحدش يقدر يمشيني , والكل في البلددي عارف ان ده مكاني . * انت عايش لوحدك؟ اه انا هنا لوحدي , بس مراتي هناك ومعايا 3 ولاد بس في الضياع , وكان معايا عيال ماتت , وكله في حاله , وكله بيعدي . * وفين اولادك؟ عايشين هنا في مصر , وعندهم بيوتهم . * فيه حد بيزورك من اولادك؟ لا خالص , ولا انا بروح ولا هما بييجوا , اصل مفيش راحة , ولا حد مبسوط , ولا انا ولا هما . * وانت معاك فلوس دلوقتي؟ الحمد لله , بس سرقوهم في المحطة مرة , وهنا مرة لقيتهم قطعوا جيبي بالموس , وقلت مفيش مشكلة , ما انا يا ما صرفت , وكله بيخسر , وكله عادي , وانا طول عمري بتسرق ! * طيب انت ايه مشكلتك دلوقتي؟ مشكلتي ايه بس , انا زي الفل , بس مشكلتي ان مفيش راحة مع الجو , وانا والدنيا مش مرتاحين مع بعض , وانا تعبت منها وهي تعبت مني , والظروف بقت وحشة وكلها مشاكل , ومفيش نفس لحاجة في الدنيا دي . * وانت عايز ايه من الدنيا؟ عايز اتجوز علشان مش هافضل لوحدي كده , واهي تتعب معايا هي كمان شوية , بس علشان اتجوز مش هاينفع تعيش معايا هنا لان ده مكاني لوحدي , فعايز شقة كمان , ومش عايز فلوس , بس مش معايا فلوس , بس اتجوز في الحلال , واهو احلي من النوم لوحدي في الشارع . * وانت بتعمل ايه لما بتقعد لوحدك؟ لازم اصبر روحي , ومهما حصلت اي مشكلة لازم اصبر واستحمل , لاني عارف انه من زمان والبخت مايل , وبقعد احكي حكاياتي وحياتي كلها هنا , بس مش عايز حد يتكلم معايا .
