سيس..كلمة بقت تتكرر كتير في مصطلحات الشباب الأيام دي ..من غير أصلا ما نعرف يعني ايه شاب سيس ..ولا ايه هي مواصفاته..بس فيه شباب عارفين مين هو " السيس " . ولما سألناهم قالوا " لو مسقط البنطلون وحزامك بينور وضارب ال mp3 في ودنك..تبقي شاب سيس " ، طبعاً دى مجرد علامات مش شرط تكون حقيقية لكن الشباب بيقولوا أنها غالباً بتعبر عن الواقع .. تعالوا نعرف تفاصيل أكتر منهم .. سيس يعني واد تافه وبيقول مامي وبابي..ده كان رأي أحمد علي-24 ليسانس آداب-واللي بيقول: أنا قابلت شباب سيس كتير، وتعرف الواد السيس من شكله ومنظره، فتلاقيه مسقط بنطلونه، وبيلبس ألوان غريبة، وكمان شعره طويل و" مفلفله " ولابس كاب، وكلامه كله فيه مياعة شوية.. وده نفس رأي آسر إبراهيم-23 سنة كلية حقوق-، وبيقول : السيس بيلبس تي شيرتات فيها ترتر، وكمان بيلبس الحزام اللي بتوكة عريضة، وساعات بتكون بتنور، ودايما بيسمع أغاني وخصوصا في المواصلات، ورنات موبايله بيئة وصوتها عالي . وبيقول عمر المرجاوي-21 سنة كلية تجارة-: الشاب السيس ده فيه منه كتير قوي في كل مكان، وهو دايما بيبقي مسقط بنطلونه، وبيلبس جينز ديرتي، وعمره ما يتكلم في حاجة جد أبدا، فكل اهتماماته تافهة، ولا يشغل باله أي مشكلة أبدا. ومعني كلمة سيس هو البلح الفاسد اللي بيسقط من النخل ..ده التعريف اللي قاله أحمد المعتصم-23 سنة كلية تجارة-واللي قال: سيس يعني إنسان مالوش لازمة في الحياة، وأهم حاجة عنده البنات وبس ، وكلامه مختلف عن أي حد. أي شاب سلبي يبقي سيس، ده كان رأي أسامه أحمد-22 سنة كلية آداب- وبيقول: الكلمة دي بقت تتقال كتير ، بس فعلا لما أكون شاب سلبي وماليش أي رأي في أي حاجة مهمة يبقي أنا فعلا شاب سيس، ومش شرط يكون ولد، ففيه بنات سيس كتير. وبيقول محمد عبد الله- 24 سنة-: فيه حاجات كنت بعملها ، وبعد كده اكتشفت إن اللي بيعمل كده يبقي شاب سيس، يعني مثلا البنطلون المسقط، ولما أكون ماشي في الشارع بسمع أغاني في ال mp3 . السيس بيبان من كلامه..ده كان رأي أيمن مصطفي- 22 سنة كلية تجارة-: وبيقول الشاب السيس بيقول كلام غريب وله مصطلحاته اللي بيكررها في كل كلام ، زي كلمة (فكك)، كلمة (الحوار ده فكسان)، وبعدين الشاب السيس هو نفسه مش شايف إنه سيس، وبيبقي موقّف شعره بالجيل، وفلوس أهله هي السبب في كده ، لإنه شاب متدلع.
