أول يوم رمضان بيبقى خناقة بين أم الزوج وأم الزوجة.. كل واحدة عاوزاهم يفطروا عندها أول يوم وكأن رمضان هو أول يوم بس. الفكرة إن الخناقة دى بتنتقل إلى الزوجين وكل واحد عاوز يفطر عند أمه أول يوم. يا جماعة الموضوع مش محتاج خناق نهائى، رمضان 30 يومًا وبعده العيد، يعنى ممكن أول يوم رمضان عند حد وأول يوم العيد عند التانى والموضوع يتحل بسهولة. مش لازم كل حاجة خناق وقفش، ومفيش حاجة اسمها كل واحد يفطر عند أهله أول يوم، انتوا أسرة ومن حقكم تفطروا مع بعض بلاش استسهال علشان كل واحد ميزعّلش أهله. الاتفاق والتنسيق مفيهومش حاجة تزعل ورمضان قاعد معانا مش رايح فى حتة. انبسطوا وافرحوا بلمة العيلة أول يوم على الفطار، بجد دى حاجة حلوة أوى والأولاد بيحسوا بفرحة رمضان والأهالى بتنبسط بولادها وأحفادها. اللمة حلوة طبعًا، بس الأهم القاعدة الجميلة والمشاعر اللطيفة بين الأسرة. الزوج يبقى حاسس إنه قاعد مع أهله وأخواته، والزوجة تبقى حاسة إنها قاعدة مع أهلها واخواتها، مش بقى دى بتقول إيه وده بيعمل إيه ومين قالى إيه ومين مسلمش بطريقة حلوة، وكلام ملوش لازمة ومش بيعمل غير المشاكل رمضان كريم وكل سنة وانتم طيبين، ابقوا قولوا ليا مين فطر أول يوم عند مامته ومين عند حماته ومين فطر لوحده زى حالاتى.
