إحنا كستات بتجمعنا صفات مشتركة كتيرة بالرغم من اختلافاتنا الثقافية والاجتماعية، وده غالبًا نابع من إننا بنتصرف كستات مصريات. فى تصرفات بتكون غير منطقية ومش مبررة، يعنى مثلاً أول لمّا تليفون الزوج يرن وتبتدى المكالمة تتقلب على المؤنث تلاقى الزوجة كرّست كل حواسها لمعرفة المتصل وأسباب المكالمة، وده بيكون تصرف عادى بتقوم بيه أى زوجة مصرية أصيلة. لمّا يكون خارج وريحة البرفان مهفهفة واللبس الشيك وواقف قدام المرايا، تبتدى تسأل مين، فين، إمتى، وليه؟ وبتكون عاوزة إجابات محددة وواضحة، والموضوع عندها بيكون غير قابل للهزار، ده تصرف طبيعى جدًا لأى زوجة مصرية أصيلة. أول لمّا يفكر يجيب موتوسيكل، تبتدى شكوكها تظهر وتستعيد كل المسلسلات المصرية اللى الزوج فيها قرّر يشترى موتوسيكل ويطلق مراته بعدها. أول لمّا تسمعه يغنى ويشوف الدنيا حلوة، تبتدى تقلق وتدوّر وراه. لمّا يبتدى يحط بوستات غريبة على الفيس بوك ويحصل تفاعل كبير من الجنس الناعم، تبتدى ساعتها تتقمّص دور المفتش كورمبو وتعمل تفتيش عام على الأكونت بتاعه. أنا بقى لو قرر يغير صورة البروفايل بتاعة الأكونت وحط صورة حلوة مثلاً وبدأ سيل الإعجاب يتهافت على الأكونت ساعتها بتقوم عاملة حاملة على الأكونت بتاعه وساعتها بترد على الكومنتات بتاعته، وده بيكون نوع من إثبات إنها موجودة وظاهرة وواقفة لأى حد ممكن يقرب من جوزها كأى زوجة مصرية أصيلة. أو لمّا يكونوا فى مكان وتيجى مجموعة من الستات تسلم على جوزها وهى متعرفهومش، وساعتها بتتقدم وتبتدى تعرّف نفسها عليهم قبل ما جوزها حتى يقوم يسلم عليهم. اختصارًا؛ الست المصرية صعبة ومش سهل حد يلعب بيها وبتكون مدققة فى كل التفاصيل حتى ولو مش مبينة ده.
