الأمثال لا تكذب... لكل مثل مقال قيل فيه، وتم تأريخ المثل دلالة عليه.. وصدق اللى قال «محدش بيموت من الجوع».. النهاردة هنأرخ مثل جديد «محدش بيعيش عريان.. هتتكسى بأقل الأثمان».. ياما ناس لابسة من أغلى الماركات وهم عراة أمام أنفسهم.. وياما ناس لابسة عادى ولكن بأخلاقهم وأسلوبهم الراقى هم أغلى كثيرا مما يرتدون.. فليس شرطاً أن تجعل أغلى ما فيك ملابسك فقط!! هذه جولة للتعرف على الملابس الشعبية.. أماكن بيعها.. الأسعار.. من أين وإلى من. بدلة كاملة والسعر مفاجأة!! سامح مختار .. بائع بدل عمره 37 سنة.. يعمل بائعاً منذ 17 سنة، يقف فى العتبة أمام محل «حلاوة» يعرض جزءا من البدل على شماعة عرض والجزء الآخر ملقى على صندوق من الكارتون.. توقفت أمامه لبرهة من الوقت مذهولة من سعر البدلة التى كتب عليها 180 جنيها، كانت تباع ب 90 و 80 جنيها قبل الثورة، كما يقول سامح. وأكمل: البدل خامات مصرية.. القماش، الخيوط والبطانة، والتفصيل فى مشاغل مصرية، وسعر البدل من 150 إلى 200 وبدل قطع أخيرة من بواقى معارض تكون قطعة تركى أو إيطالى مقاس واحد ولون معين أشتريها وأعرضها عندى.. وكل بدلة لها زبونها وأغلب من يشترون من عندى محامون لأنهم أكثر ناس شغلهم يعتمد على البدل.. بدل الأفراح والمناسبات هنا سعرها 270 ... وفى المحلات والمعارض تعدى قيمتها الألف جنيه، لو فى محامى محتاج أكثر من بدلة أكيد يشترى من هنا، حتى لو كان تقفيل البدل الغالية أنضف.. بس هو محتاج 4 أو 5 بدل عشان يغير فيها. اشترى يا بيه ب «15 جنيه»!! فى العتبة وسط «فرشات الرصيف» هذا يبيع أحذية وذاك ملابس داخلية.. صوت فى ميكرفون ينادى «أى حاجة ب 15 جنيه قلبى ياهانم قلب يا بيه» توجهت له على الفور، فإذا بطارق بركات يضع أمامه على طاولة خشبية كبيرة ملابس أطفال وشباب، تى شيرتات من مختلف المقاسات والألوان منها السادة، المنقوش والمطبوع. سألته، فين اللى ب «15 جنيه»، فأشار بيديه على تيشيرتات أطفال، وتيشرتات الشباب ب 20 وفيه 25 المطبوع أغلى من السادة مع أن السادة كله قطن والمطبوع مخلط قطن على بولستر بس الطباعة غالية.. طارق يعمل منذ عام بائع ملابس على فرشة على الرصيف، بعدما كان يملك مصنع للتريكو، قال: فى الشتاء نأتى بالملابس من الدقهلية لأن أكبر مصانع التريكو هناك فى قرية طنامل، قرية ميت مسعود وقرية سالمون.. والأسعار تبدأ من 30 جنيها لأى حاجة تريكو, نفس البضاعة فى المحلات 5 أضعاف السعر، وفى الصيف نشتغل على التى شيرتات ولبس الأطفال وأغلبه من الإسكندرية أو من مصانع العاشر من رمضان ومصانع المطرية، وكلها خامات مصرية وتفصيل مصرى وده اللى مخلى سعره رخيص.. وفى المحلات تباع نفس التى شيرت ب 90 جنيها.. وناس كتير بتشترى. ملابس داخلية على الرصيف! أما محمد عبدالعال 29 سنة.. بياع من 12 سنة يبيع ملابس داخلية نسائية.. يشكى الحال ويقول: كل الطبقات تشترى من عندنا.. لكن حجم الشراء قل.. الملابس الداخلية شيء أساسى لا غنى عنه، حتى اللى تجهز نفسها كانت تشترى دستة أو اثنتين، دلوقتى تشترى نص دستة.. زمان كنا بنبيع 3 قطع من الملابس التحتية ب 10 جنيهات، دلوقتى القطعة ب 12 و 15 جنيها.. البضاعة من تجار الجملة وتجار الجملة يجيبوها من بورسعيد.. وعقبال ما توصلنا كله يغلى على كله. الترتر يكسب !! أما العبايات الشعبى فلكل عباية اسم، اسم فيلم أو ممثلة أو حتى راقصة.. عباية صافينار.. كلها رسومات وترتر وعباية «ماتذوقينى يا ماما» كلها ألوان ونقوشات بطول العباية.. وعبايات المحلات شيء وعبايات الرصيف أمر ثانى. الحاج محمد عمره 55 سنة قال: عندى فى المحل نوعين من العبايات الشعبى، بالطرحة ثمنها 120 جنيها وعبايات أعلى من حيث الخامات والتفصيل وسعرها 240 جنيها أيضا بالطرحة وكل الخامات مصرية.. معنديش عبايات خليجى، وأغلب الشغل اللى بيتطلب الشعبى المنقوش.. العبايات السادة قليل جدا اللى بيشرتيها لو حد رايح عمرة أو يحج، البنات تحب شغل ترتر كثير على الأساور وعلى طول العباية وقماش العبايات بين الستان اللامع، والشيفونات.. وفى طبعا عبايات أرخص على الرصيف ب 60 جنيها من غير الطرحة. مبروك على الأرض!! فى العتبة توقفت عند مينا سعيد 35 سنة بائع أحذية.. قال: أكثر ما يطلب هنا «الصابوهات» أو الصنادل والشباشب.. وهذه فئة سيدات الثلاثينيات أما العشرينيات من العمر يطلبون «الكوتشي» والأسعار عندى تتراوح من 25 جنيها إلى 70 جنيها.. وممنوع الفصال لأن مفيش حذاء هيكون أرخص من كده.. وأغلب البضاعة نشتريها من تجار الجملة من إسكندرية أو الموسكى. يا متعلمين القميص بعشرين!! فى نهاية جولتى تقابلت مع الحاج صبحى عثمان 60 عاما.. كتب يافطة «يا اللى بتقروا ومتعلمين القميص ب عشرين»، لا يقبل الفصال طبعا، ولا يقبل أن تقلب فى البضاعة كم قميص معروضة على الرصيف وبقية القمصان مغلفة عليها المقاسات.. قال: المحلات تبحث عن المكاسب المهولة.. أنا كمان بكسب وببيع كل بضاعتى بس مكسب قليل قريب أحسن من مكسب كبير بعيد.. القميص نسبة الأغلب فيه بولستر.. بس يعيش ويقضى الغرض، وناس كثيرة تشترى عندى نص كم وكم.. مقلم وسادة .. والقميص ب 20 جنيها وأنا كسبان فيه.. وشباب كثير بيشترى ورجالة بتجيب ب 10 قمصان وبيدفعوا 200 جنيه ثمن قميص واحد يتباع فى المحلات وينوع ويبدل فيها. •
