• عبادة أشهد إياك بقلبى وبألا حب سواك فصلاة القلب إلى صوتك وتحج الروح إلى قدسية لحظتنا تتطهر من ظلم الإشراك وتطوف حواليك طواف الكرة الأرضية تسعى ما بين العين وبين القلب وتقدم قربان الكلمات ترجم كل الأفكار الأخرى تطرد كل المندسين على لحظتنا الصوفية وأعود أكررك صلاتى أستغفر من كل ذنوبى أمحو لحظاتى المخلوقة قبل ظهورك نتواصل رغم الإبعاد وأعيش الإحساس الأعظم ... يا من أشهد ألا حب سواه .. وحّدتك وعبدت الله • لحظة جنون دى لحظة جنون هاطير فيها عندك وأعدى الحصون وابدأ بشوقى فى كل الفنون فنون المحبة.. لقلبك فتون ومن غير ما تطلب حتلقاه حنون دا قلبى اللى نفسه يكون لك.. تكون ف وسط الدقايق سفينة سكون ويرسى ف شطك وهمه يهون دى لحظة جنون... هاجيب فيها كل الثوانى.. تدوقك وأخلط بروحى دمايا ف عروقك وأكون فيها قمرك وأشاهد شروقك وأشهد ب إنك ومين راح يفوقك والغى ب وضوحى جميع الظنون دى لحظة جنون.. هاعود منها تانى لأرض الحياة وأغرق ف بعدك إلى منتهاه ولما ينادى فى قلبى صباه مفيش حد يرجع ندايا أصله تاه ويرفض طريقى يعدنى للقاه وأصرخ ب عطشى وآه منه.. آه ويفضل هوايا فى قلبى أتون للحظة ما أقابلك ف لحظة جنون • اختيارى أنت اختيارى بكل عنف الكلمة.. فيك معنى الحياة.. م انت اختيارى مش قسمة المكتوب ولاحكمة إله ... لا اختيارى لحظة سؤالى ما بين وجودى وبين سواه.. كنت اختيارى وف جنة الأحلام.. تكون شجرة ف سماه.. تبقى اختيارى أنزل لأرض الشوك.. وأعيش رغبة وصلاة.. وأحيا اختيارى لكن لشياطين التعاسة فحيح.. لولاه.. دام اختيارى بيجمّلولى الزيف عشان أنسى ف لقاه.. عمق اختيارى وتضيع عهود الكلمة وأسبح ف اتجاه.. عكس اختيارى وادخل نيران البعد علشان قلبى تاه.. خنت اختيارى ويفور طوفان الصدق.. وألقاك النجاة.. كل اختيارى وأحاول أوصل لك.. آلاقى النور دعاه.. رفض اختيارى وظلمت روحى وقلت قدرى ب إيدى.. ياه.. من اختيارى وإن عدت تانى هاعود.. وسبحانه ف علاه.. خلق اختيارى يارب نورلى بصرتى وخلى خيرى يكون صداه.. هو اختيارى تسليمى ليك سعدى وح يهوّن معاه ... حمل اختيارى • الشعراء يتبعهم الغاوون أنا م الغاوين وأحلف يمين قلبى بيتبع أشعارك مهما تميل.. برضه جميل وإن هدّ فعلك أقوالك وتهيم.. أهيم.. وامشى ف حميم كذبك أصدق أشعارك وشتاك د نار.. وخريف خَضار والضلمة تولد أنوارك م أنا م الغاوين وساعات م اكون ليه الجنون؟ م الكون براحه ف أحضانى وهج الحياة بيزيد معاه قوة غنايا.. وإيمانى أنسى المحال.. وأحيا ف آمال يطيب لها كل حنانى وب كلمة أعود وِرد الوجود.. وعبقرية أحلامى حكم الإله.. فين النجاة شطرك بيطرح أغصانى م أنا م الغاوين أنا.. م الغاوين •
