21 ف حرب الوعى بيناضل ولا فاصل .. ولا فاضل ولا حدش سواه فاضل من الصحبة الدرامية ... من الصحبة اللى حاطة أساس دراما القاهرة والناس ما بين الفكر والإحساس دراما وفن وهوية ... وقال البحر .. للنوة كلام نسمع له نتقوى وناصر ف القناة قوة حكاية أمة مصرية ... فصيح خارج من البيضة بيصطاد الفساد صيدة ولا يرفع رايات بيضة ولو لدواعى أمنية ... يا طالع نخلنا العالى يا مخرج فننا الغالى يا طاقة نور ف موالى طريق إبداع وحرية 22 أهم .. أهم .. أهم الشياطين الحمر لكن هو ملاك ... جوه وبره الملعب عمرى ماشوفته بيغضب ورد بدون أشواك ... والأخلاق ف الكورة نحجزلها مقصورة فيها يا صاحبى عُلاك ... أحسن أحسن لاعب جاب لمنافسه متاعب لو حارس أو باك ... الهداف .. هداف خلى الكل يخاف ويجيلهم إرباك ... من أيام هيديكوتى ياما هتفت بصوتى وانا ف الماتش هناك ... ولا كان يسكت حسى إلا أن شوفته بنفسى بيسخن ف تراك 23 الشرق سحره قديم جن وبخور وحريم ازاى يجيب عصفور طاير .. بعقل سليم ... عصفور جميل .. اصطفى أجمل ما فى الفلسفة وف كل لحظة صفا يأتى بفكر عظيم ... نائب من الأرياف راح للأدب .. وأضاف يدخل ف أى خلاف يطلع كأنه نسيم ... هو اللى قال الحب رصاصة جوه القلب والروح تعود للشعب لما يصادفه زعيم ... ما بين عصا وبيريه أثار جدل حواليه بس الغريبة يابيه حتى حماره .. حكيم 24 كشكش بيه .. أو كشكش باشا هو الباكى .. وكله بشاشة لما يغنى .. ولما يمثل أوحش صوت .. على أحلى وحاشة ... يطلع خايف .. قلبه جريء يطلع صايع .. وشه بريء أما الشيء ولزوم الشيء درس الهبش مع الهباشة ... لما تحية .. لعبت بيه لعبة ست .. بحد نبيه خلاها تحفى عشان ترضيه نَصَر الصدق .. على البكاشة ... شوف منديله اللى بيشكى له لما حمام طارت زغاليله فين الأوسكار من تمثيله حاشا مثاله ح يظهر حاشا ... وشه بيضحك .. عينه بتدمع طالعة جنازته .. وفيلمه بيلمع هو يغنى .. وليلى بتسمع فرح وحزن .. بيملوا الشاشة 25 أنا الأديب الأدباتى ومصر عقلى وحياتى وباهدى نوبل لاخواتى جدعان ف حى الجمالية ... أنا الأديب اللى يشيّد عشان دروب مصر تعيّد واسأل أمينة وسى السيّد كان مين عشقهم قبليّا ... أنا الأديب .. وانتى أديبة يا أمة مصرية عجيبة انتى اللى كاتبة كفاح طيبة والفضل ليكى .. مش ليّا ... أنا الأديب .. اللى باعيشها وكأنى أطيب حرافيشها وكأنى عسكرى من جيشها لابس صناعة محلية ... أنا الأديب .. والمسكينة مصر اللى عايشة ف سكينة تضربنى ليه بالسكينة يا ابن العصور الجاهلية 26 من النبى الفرعون إلى كهنة آمون الرب الأعلى واحد فماذا تعبدون ؟! ... سايبين الناس حزانى وتتاجروا بالكهانة مش هية دى الديانة دا ضحك على الدقون ... من مصر الفرعونية باعلنها وحدانية لرب الإنسانية إليه تُرجعون ... موميائى ف التابوت تتحدى أى موت والباقى من ابنى .. توت أغلى من مال قارون ... كتبنا على الحجارة أغنية الحضارة يا مصر يا منارة بالفكر والفنون
27 المصرى قالها بكل جلال أنا ح اكتتب واعمل تمثال وصاحبنا ينحت نهضة مصر إبداع مالوش ف حاضرنا مثال ... الفلاحين دفعوا الملاليم علشان يشوفوا فن عظيم مصرى جديد من مصرى قديم سحر الفراعنة حضر ف الحال ... مصر الصبية مع أبو الهول فلاحة صامدة وقد القول ولا دول ح يتحدوه ولا دول إبداعه عابر للأجيال ... لسه باريس فاكرة الأمجاد ياما جاب جوايز كبرى .. وعاد روح متحفه .. وخَد الاولاد وجاوب لهم ف الفن سؤال ... مين من حجر جرانيت أو طين يصور الريح .. و « الخماسين»؟! ومين نحت يا مصريين « ابن البلد » .. وكأنه غزال ؟! 28 التخت جاهز .. وسومة حاضرة والغنوة .. كلمة .. وانت اللى أدرى والحفلة كاملة تستنى شاعر عاشق متيم .. مشاعره نادرة ... الحب باين ف عيون كتومة والشعر يجرى للست سومة وانا والحبايب حاضرين عزومة ما بين تجلى وإحساس وقُدرة ... سهران لوحدى .. يشجيك أنينى جددت حبك .. عودت عينى أغانى تشعل حبى وحنينى ولهيبها يوصل ف الغيط لخضرة ... وانا اللى عمرى ما ف يوم هجرتك أحب شعرك وافهم إشارتك فنك رسالة تعلن حضارتك والغنوة توزن مليون محاضرة ... الحكمة نعمة .. وإنت بابها وكفاية إنك تنقل أدبها رباعية .. عمر الخيام كتبها وكأنى حاضر وياكو حضرة 29 ومنين أجيب ناس لمعناة الكلام يتلوه ابن البلد .. يا بلد .. جاروا عليه وباعوه قائد وثورى عفى .. وأهله بيحبوه قال للخديوى اتولدنا كلنا أحرار ما احناش عبيد السيادة .. ولا متاع تورثوه ... فلاح وعاشق وطن .. من أجمل الأوطان واللى يحب الوطن عمره ما كان غلطان الحق ع اللى يخون .. خديوى أو سلطان الحق ع اللى يسيب بلده ف وسط طوفان ويقول دى هوجة وح تخلص .. سيبوه لوحده سيبوه ... ديلسبس أصل الخيانة .. ومعاه كمان توفيق صعب عليهم يشوفوا .. فارس ونجمه مضيء صعب عليهم يا بلدى .. ثورة .. تفك الضيق نظرة حنان للعطاشى .. جايز تبل الريق فتحوا قناة السويس للانجليز .. حاصروه ... عشرين سنة والبطل .. ف المنفى .. ف سرنديب يتمنى يرجع .. وراضى .. بالسجن والتعذيب حبيب ينادى لوطنه .. أغلى وأعز حبيب والخونة كانوا هنا .. بينشروا الأكاذيب بس التاريخ أنصفه على ناس كتير ظلموه 30 الناس عرفوه بعد وفاته وعرفوا نُبله وصفاته المعجزة ف شخصية مصر كانت رسالته ف حياته ... العبقرية ف زمانها والعبقرية ف مكانها والعبقرية ف حنانها مصر العظيمة ف صفحاته ... وقفوا التاريخ والجغرافيا يشاهدوا أفكاره الصافية لا شعر ولا وزن وقافية يوفوا علمه .. وكتاباته ... ترك الحياة على بابه .. وساب كل المناصب والألقاب للعلم عاش .. ودخل محراب مافيهوش سوى العلم بذاته
