الغرام .. مش كلام بحر كان هايج ونام الغرام.. مش سلام نظرتين وسط الزحام الغرام .. مش هيام جوّه العيون مش حكاية نسمة سارية ورفرفة بجناح حنون مش عصافير الكناريا وزقزقة فوق الغصون الغرام .. زلزال جنون عربدة وحكمة ومجون انتحار فى حضن نشوة إما أكون أو لا أكون الغرام .. اجتياح .. واحتياج اندماج وامتزاج بحر كان نايم وهاج شفتين ليهم مزاج يرحلوا لكل الأماكن مهما كان الاحتجاج الغرام .. انتقام من ثوانى البعد بينّا من ليالينا الحزينة أرضنا اللى معطرينها واحنا بنهز المدينة بحرنا اللى مجننينه واحنا بنشق السفينة الخجل من كل مرة تستخبى القُبلة فينا الغرام .. رحلة مغامر ماشى فوق برق السحاب صرخة الريح اللى داخلة قلبنا من ألف باب السؤال اللى بنعشق دهشته وننسى الجواب صورتى ف عيونِك وصورتك بعد ما نشيل الحجاب إعلانات رغبة ومعاصي واحنا رافضين الحساب الغرام .. روحين .. عرايا .. (باحترام) ورقة التوت اللى بينهم شايفة نفسها ف المراية (احتشام) ابتسامة الدنيا لما نتحرم م الابتسام الغرام قلق الحقيقة الغرام طفل الخطيئة اللى رافض الفطام الغرام هو الغرام لا حلال ولا حرام اختبار أسواره شايكة حلم ممنوع ع الملايكة لو شافوه أو داقوا منه .. مرة يختل النظام الغرام يعنى احنا واحد قبل قبل .. وبعد بعد رغم إن عيونّا باصة ف اتجاهين ضد بعض