يشهد معرض القاهرة الدولى للكتاب فى دورته ال46 إقبالا كبيرا من قبل الفئات العمرية المختلفة خاصة الشباب الذى حرص منذ اليوم الأول لافتتاح المعرض على التواجد وشراء الكتب والمطبوعات أو المشاركة فى حفلات التوقيع والندوات الثقافية، وارتفعت هذا العام نسبة المؤلفين الناشئين، وعن زيارتهم للمعرض وردود أفعالهم على التنظيم والمجلدات الموجودة.. يدور هذا الاستطلاع بعد عناء وطابور حضرتك عاوز رواية «الحب فى زمن الكاديلاك»، لا والله خلصت هكذا بدأ «محمد بيومى» رحلته مع معرض الكتاب واستنكر عدم وجود طبعات احتياطية من قبل دور النشر المسئولة عن توزيع الكتب، واضاف محمد ان كثيرا من الكتب التى كان يريد شراءها لم يجدها بسبب نفاد الطبعات مما اصابنى بالصدمة لأنى من اسكندرية، مؤكدا ان حضوره كان لدعم الكتاب الذين يحبهم مشيرا الى انه لابد ان تتوافر نسخ من الكتب التى يقبل على شرائها الجمهور. واضافت «مروة جوهر»: من اكتر الكتب اللى عجبتنى فى معرض الكتاب هى رواية «المضيفة» لانها بترد على المعتقدات المغلوطة اللى الناس بتقولها والحاجات المضحكة ان فى ناس لسه فاكرة ان المضيفة لازم يتوافر فيها عنصران شكل مقبول واجادة لغة أجنبية، ومش مهم أى حاجة تانية، هى بتعمل ايه غير انها تجر عربية الأكل فى الكابينة وتقدمه للناس وترجع تلم صوانى الأكل الفاضية؟ «تن تن.. تن تن».. لو سمحتى كوباية مياه.. ممكن بطانية.. مفيش دوا للصداع؟ الناس معذورة لأن هو ده اللى بتشوفه، طبعًا أنا كمان كنت فاكرة كده ولكن كتاب «المضيفة 13» بيصحح وجهة النظر الغلط المنتشرة وكمان تنظيم معرض الكتاب حلو جدا السنة دى. اما «بيتر ماهر» قال ان معرض القاهرة الدولى للكتاب لابد من تحويله إلى حدث ثقافى وطنى تشارك فيه جميع الفئات العمرية والثقافية والاجتماعية، واقترح بيتر أن تتحول أيام المعرض إلى ما يشبه العيد وتمنح الدولة المواطنين إجازة رسمية ليشعر المواطن غير المهتم بالقراءة أو الثقافة أن هناك حدثا مهما جدا اسمه معرض الكتاب، ولابد ان يكون هناك تعاون بين دور النشر الثقافية الحكومية والخاصة للمساهمة فى نشر الثقافة، وتوفير أتوبيسات مجانية من كل المحافظات أو تخفيض تكلفة رحلات السفر بالقطار إلى أقصى حد ممكن حتى تتاح الفرصة لمن هو من خارج القاهرة للمشاركة فى المعرض حتى لا تكون الثقافة حكرا على أهل القاهرة فقط.. الى جانب تخصيص أيام معينة بالتليفزيون الرسمى لمعرض الكتاب فقط لعرض جميع الفاعليات الثقافية التى تدور فيه حتى يتابع المشاهد العادى جميع فاعلياته.. وتفعيل مشروع القراءة للجميع لدار المعارف وجميع الهيئات الثقافية كما يتم توزيع كتب مجانية على الجمهور المتواجدين داخل صالات العرض. وتقول «اسماء فاروق» ان هناك عددا من القواعد التى لابد ان يأخدها زائرو المعرض فى الاعتبار حتى يستمتع بجولته من بينها التركيز على الكتب التى تساعد على تنمية التفكير مثل الكتب الفلسفية أو العقلية أو النقدية ومتنخدعش بعناوين الكتب أو بأسماء المؤلفين، وتصفح الكتاب قبل ما تشتريه عشان ممكن تغير رأيك، إسأل أصحابك عن الكتب اللي هيشتروها وحاولوا تشتروا كتبا مختلفة وتقوموا بتبادلها بينكم، فقراءة الكتاب أهم من شرائه. أعطِ الأولوية للكتب النادرة فى المكتبات، لأنها فرصة مش هتتكرر، ومن أجِل شراء الكتب المنتشرة اللي ممكن تشتريها من أي مكان، متشتريش الكتاب من أول مكتبة، واتجول في المعرض لإنك ممكن تلاقي نفس الكتاب بطبعة أجود أو سعر أقل، فاوض أصحاب المكتبات على الأسعار اللي بيعرضوها لأن معظم الكتب في المعرض بيكون عليها خصم بيصل في كتير من الأحيان ل50%، اهدي كتابا لمن تحب في الموضوع اللي بيحبه، وحاول إنك تكتب له إهداء يشجعه على القراءة والاطلاع. لو كنت من القراء الجدد، حاول تجيب الكتب الصغيرة وسهلة الهضم لأن اقتحامك للكتب الكبيرة ممكن يحبطك في البداية، من الأفضل إنك تنوع الكتب اللي هتشتريها عشان تشمل كتباً في مجال تخصصك الدراسي، ومجال اهتمامك الشخصي، ومجال فهم الواقع على اختلاف أشكاله الاجتماعي والاقتصادى والسياسى، حاول إنك تخرج عن نمطك الروتيني في القراءة فلو إنت متعود إنك تقرأ في مجال معين حاول تجدد فى المجالات المختلفة. اقرأ اسم مؤلف الكِتاب كويس لأن في نوعية من الكتاب بيكتبوا أسمائهم بحيث تكون مشابهة لكتاب كبار معروفين عشان كتابهم يتنشر لو عاوز تشتري كتاب معين ومتردد، ممكن تراجع آراء الناس اللي سبقوك وقاموا بقراءته على موقع Goodreads، يفضل أنك تجيب معاك أكلك لارتفاع أسعار المأكولات والمشروبات داخل المعرض، واللي ممكن تستفيد من فلوسها في شراء الكتب. ويروى «اسامة مجدى»: المعرض منظم ولكن هتلاقي في المعرض ناس كتير بتعرض سلع انت ممكن تكون مش في حاجة ليها تماماً، لو معندكش رغبة في شراء السلعة المعروضة اعتذر ومتضيعش وقتك وتركيزك ونظم مسيرتك فى المعرض علشان تقدر تلف كل الاماكن اللى فيها الكتب المختلفة، وحاول انك تستفيد من الفعاليات الثقافية والفنية، واسأل عن برنامج المعرض فى المركز الإعلامي واستمتع بالندوات والأمسيات الشعرية وحفلات توقيع.
