شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية، فهم بمثابة توثيق وشهادة على عصرهم، ونحن نخصص هذه المساحة من الإبداع بنشر عدد من القصائد احتفالا بذكرى انتصار الجيش المصرى العظيم على العدو الإسرائيلى فى حرب أكتوبر المجيدة عام 73، ذلك الانتصار الذى كان دائما مجالا خصبا لقصائد الشعراء وكلمات الأدباء، مخلدين لتلك الذكرى التى ظلت وستظل رمزا لصمود وانتصار الجندى المصرى المقاتل وذوده عن أرضه وعرضه، وتروى أيضا للأجيال المتعددة جيلا بعد جيل تضحيات الجنود البواسل التى روت دمائهم الطاهرة أرض وتراب هذا الوطن وصولا إلى نصر بذلوا من أجله الغالى والنفيس، يصاحب تلك القصائد عدد من لوحات فنانى الرسم الصحفى فى مصر التى تعبر عن نصر أكتوبر. منشور وطنى علنى رقم 1 أيها المواطنون أيها المواطنات مصر من طول السكات بتناديكم تسمعون؟ عطرونى بالبارود كحلونى باللمون عايز اغمض أو أفتح يرجع الشوف للعيون والقى سينا جوا حضنى والجناين والزتون يا حبايبى يا جنودى ما عساكم تفعلون يحكى من أمثال زمان كل وقت وله أذان يا بهيه وخبرينا يعنى إيه معنى الأدان؟ لما نصحى فى الصباح والخلايق مجروحين تبقى حى على الكفاح والسلاح يا مظلومين واما نصحى بالسلام والخلايق مرتاحين تبقى حى ع الكلام والمناقشه يا أفلاطين أيها المواطنات مصرنا ست البنات عايزه منكو تزوقوها وإنتو أهل المكرمات عايزه عقد النصر وردى والحلق بالدلايات عايزه طرحه وعايزه فرحه وعايزه ساعه م الساعات تعجنوا الحنة السويسى من زتون البيارات ما عساكن فاعلات أيها المواطنات؟ يا حياة الشعب يا مصريا نور العيون الحياه والممات والمشانق والسجون والكلام والآلام والدساتر والقانون والعساكر والدساكر كله فى حبك يهون ليس فينا من جبان ليس فينا يحزنون فينا طيبه زرع طيبه بس آه لو تعلمون لو يفيض الصبر بينا تطفح النار م الأتون لو يغطى الصعب سينا والعبور يصبح جنون نرمى يا مصر العزيزة جسمنا فوق المنون وإنتى يا مصر الحبيبة عندنا جوا العيون وإحنا يا مصر الجميلة حبنا فوق الظنون كلمات – أحمد فؤاد نجم قصيدة أكتوبر من غير ما نتفاخر ونتباهى لا بالرايات اللى رفعناها ولا بالحصون اللى انتزعناها ولا بالدروع اللى مزعناها ولا بالدموع اللى ابتلعناها على الضنى الغالى وحجبناها وحياة عيون مصر اللى نهواها وأكتوبر اللى كما النشور جاها بلاش نعيد فى ذنوب عملناها أنا اتعس اللى بدعها وجناها ومازلت تحت عقابها وجزاها وحياة ليالى سود صبرناها واتبددت بالشمس وضحاها نكبح جماح الزهو ، مع أنه من حقنا ، ونحمى النفوس منه ولو « العبور « سالونا يوم عنه قول : مجرد خطوة خدناها ! كلمات – صلاح جاهين ضليلة فوق راس الشهيد
يا مصر جيشك م الصعيد وم البحاروة ومن رشيد شبان هلايلية وطيبين فينا الحنين والعنيد نعشق ولا عشق الحمام للولف والعش السعيد ونجود كما جاد الغمام باللقمة والتوب الجديد ندي بمزاجنا كل شىء لأي شىء ما دام نريد لكن عدوك يا اسماعين لو سخنت النار ع الحديد والظلم خوم ع العباد سوى من قريب او بعيد حلم الحليم يصبح جحيم والدم يتسمم صديد نرمي الغضب رمي الحطب ع النار تقوم النار تقيد واحنا الرجايل يا اسماعين في الشدة والوقت الشديد نصول نجول راكبين خيول راكية السيول فوق الجليد تكسح ضباب الليل يزول ننطح جبال الخوف تميد نطوي السراب طي الكتاب ونقابل الصبح البعيد نرجع نلاقى الدنيا نور يا مصر والإنسان جديد ننشى المداين والكفور في جو نور وبكل ايد ونجيب حليب العندليب في المهد للطفل الوليد ضليلة ونشجر التين والزتون فوق راس الشهيد كلمات – أحمد فؤاد نجم الفلاحين الفلاحين ضموا غيطان القمح رفعوا الرايات بالفجر متندية رفعوا السنابل بنادق عبوا البنادق بارود الرملة قادت حرايق والنار فى دم الجنود والحرب زى جناين الحرية مهرة و مالهاش حدود والحرب لسة فى أول السكة كلمات – زين العابدين فؤاد خفقة علم أفديك يا سيناء وزغردت من قلبها السماء وانهمر الجنود يسابقون الريح والأحلام وترسم الدماء خرائط النهار والمساء على صحائف التاريخ والجبال فى الماء كانت النجوم تعبر القناة وفى الرمال قالت المارعات لا وفى ذؤابات الشجر.. ابتسم الحمام ثم فك قيده وطار للسحاب وفوق صخرة عالية الإباء.. رفرفت أيها العلم يا قلبنا المليء بالأشواق والغضب فى كل خفقة تقول مصر حكاية نسيجها الضياء والظفر فى كل خفقة على حقولنا المط ركلمات – محمد إبراهيم أبو سنة أحلف بسماها وبترابها أحلف بسماها وبترابها أحلف بدروبها وأبوابها أحلف بالقمح وبالمصنع أحلف بالمدنة وبالمدفع باولادى بأيامى الجاية ما تغيب الشمس العربية طول ما أنا عايش فوق الدنيا كلمات - عبدالرحمن الأبنودى خلى السلاح صاحى خلى السلاح صاحى صاحى صاحى لو نامت الدنيا صحيت مع سلاحى سلاحى فى ايدية نهار وليل صاحى ينادى يا ثوار عدونا غدار خلى السلاح السلاح صاحى، صاحى كلمات – أحمد شفيق كامل دولا مين دولا مين ودولا مين دولا عساكر مصريين دولا مين ودولا مين دولا ولاد الفلاحين دولا الورد الحر البلدى يصحى يفتح اصحى يا بلدي دولا خلاصة مصر يا ولدى دولا عيون المصريين دولا مين ودولا مين دولا القوة ودولا العز دول راضعين من أطهر بز هز يا هلال هلالك هز واحنا وراك ملايين جايين دولا مين ودولا مين دولا اخواتنا ودولا بنينا دولا الأمل اللى مخلينا دولا المجد اللى مخلينا فوق الجرح نعود سالمين دولا مين ودولا مين دولا يا سينا ولاد الشهدا دولا التار لا ينام ولا يهدا خلى ترابك يسكن يهدا ويضم الشهدا الجايين دولا مين ودولا مين كلمات - أحمد فؤاد نجم أكتوبر اللي صبر مين اللى رش الندى.. على أطيب الأوطان وصب شهد المحبة.. على أجمل الأحضان مين اللى صالح نسيمي.. على هزة الأغصان ولم شمل الصحارى.. وفرش فوقيها غيطان مين اللى قال يا نبى.. جايلك فى يوم غفران أمحى الهوان والألم.. بإرادة الرحمن وأغسل بدمعى ندم.. وأبوس إيدين قرآن مين اللى قال: ارتوى.. A يا عطشان أكتوبر اللى صبر.. فعبر.. فى إيد رمضان كلمات – جمال بخيت
