* بعد موضة الناس اللى بتولع فى نفسها قدام مجلس الشعب بسبب خلافات عائلية أو لأسباب تافهة.. مش بعيد تلاقى واحد بيولع فى نفسه قدام المجلس؛ لأن الهانم مراته مضطهداه ومسودة عيشته فى البيت.. قال إيه..؟! دايماً بتديله على الغدا ورك الفرخة، وهو يا حرام.. بيحب الصدر..!! * طالما أن دار الأوبرا المصرية عملت مسابقة فى الغناء، أيوه فى الغناء، باسم عالم الفيزياء الحائز على نوبل د. أحمد زويل لاكتشافه «الفيمتوثانية» فياريت أكاديمية البحث العلمى تتم جميلها وتعمل لنا مسابقة فى علوم الفيزياء باسم مطربة «بوس الواوا»..!! * أنا على يقين من أن اتجاه مصانع الأسمنت لإضافة القمامة على الوقود، هايحل لها أزمة ارتفاع أسعار الطاقة؛ فالزبالة، زى ماكلنا عارفين، سرها باتع.. واسألوا وزارة الكهربا الزبالة جابت لها كام بعد ماحطتها على فاتورة الكهرباء..؟! * بعد القلبان اللى عملاه المسلسلات التركية فى بيوتنا المصرية خاصة مسلسل «نور» بتاع الأخ مهند.. و«العشق الممنوع» بتاع الأخ مهند برضه.. نويت والنية لله إنى أسلط اتنين صعايدة من بلدياتى يروحوا تركيا يطخوا الأخ مهند عيارين ويخلصوا رجالة مصر منه ومن بلاويه..! طبعاً أنا هاأعمل كل احتياطاتى وها أدى الصعايدة صورة مهند بدقنه وشنبه علشان يتعرفوا عليه ومايغلطوش.. لكن برضه قلبى واكلنى وخايف.. بعد كل ده يروحوا ينفذوا المهمة على أكمل وجه ويطخوا.. الأخت «نور»..!! * إلى فريقنا فى كرة «اليد» تسلم «إيديكم».. بصراحة إيديكم لازم تتلف.. فى «حديد» أداؤكم فى بطولة العالم لكرة اليد تستاهلوا تاخدوا عليه أكتر من كأس العالم.. تستاهلوا تاخدوا عليه تاج الجزيرة.. «السلطانية» بتاعة مرزوق العتقى..!! * بعدما شفت بعينى، اللى هاياكلهم الدود، بلاوى الحكام الأفارقة فى مباريات دورة حوض النيل.. حمدت ربنا على اللى بيعمله الحكام عندنا.. فمن شاف بلوة غيره.. هانت عليه بلوته..! * كلمة ورد غطاها: * شفت آخر دراسة سنغافورية بتقول إيه..؟! الضحك أسرع من العطس فى نقل الأنفلونزا..!! ** يا داهية دقى حتى الضحك هايحرَّّموه على الناس بروشتة «دكتور»..!!