مجتمعنا الحلو العسل ده بوشين.. قديمة يعني مش جديده.. شفتوا أي تجمع عائلي موجود فيه ولد وبنت صغيرين؟ أول حاجة بيقولوها للولد ايه.. عايز تطلع إيه يا حبيبي لما تكبر.. نص العيال المفترية بتقول ظابط واللي عنده وعي شوية يمكن يقولك رئيس .. جيل المستقبل بأه يا سيدي هنعمل إيه؟.. طب والبنوتة الصغيرة بيقولو لها إيه؟.. نجوزك حمادة يا سوسو لما تكبري.. والا تتجوزي أبيه خالد؟.. تبص البت بغباء كده وتقول لهم.. أنا هاتجوز بابا.. والكل يتفتح في الضحك ويخلص الموضوع علي كده وتطلع البت من صغرها يجيبولها عروسة.. تسرحها وتلبسها الطرحة وتزفها.. وأي بنت في أي مجتمع تلاقي أول لعبة نفسها تلعبها.. عروسة وعريس!! بالمعني الطفولي مش بتاع الجامعات الخاصة والورق العرفي. وتمشي البنت في سلك التعليم وكل ما تنجح في مرحلة ما يقولولها.. مبروك عقبال ما نشرب شرباتك.. وعقبال عدلك يا حبيبتي.. ولما تيجي تستشير حد في الكلية اللي هتدخلها بيبقي الرد الموحد.. يا ستي ماتشغليش بالك.. هي البنت آخرتها إيه غير بيت جوزها. وتفضل البنت تتشحن تتشحن طول حياتها علي أن الشيء الوحيد المتوقع منها في الحياة أنها تتجوز وتجيب عيال.. طب ولو ما حصلش. شوفوا معايا التلت حوارات دي. هو انت معاكي إيه دلوقت؟ معايا جوزين غوايش وماشاء الله. لأ يعني معاكي عيال؟ لأ أنا لسه ماتجوزتش. يا عيييني. بيئة تانية ومستوي تاني. وانت معاكي ايه دلوقتي. - معايا ماجستير وباحضر في الدكتوراة. - لا أنا قصدي معاكي عيال إيه؟ - لا أنا لسة ما تجوزتش. - ياعيني بيئة ثالثة ومستوي ثالث. - وانت معاكي إيه دلوقت؟ أنا معايا شيروكي. لأ قصدي معاكي تشيلدرين إيه؟ نو.. أنا لسه ماتجوزتش. أوه ماي جود.. هااانييبيي. هو هو الحوار في كل المستويات. وأنا من هنا بقولها.. لو ماحصلش.. لو ماتجوزتش وما جبتش عيال وماقدرتش اتبع خطة المجتمع.. أنا برضه ليه شخصيتي وحياتي ومش هابقي أبدا صفرع الشمال.