قعدت سرحت شوية مع نفسي في مصر وافتكرت اد ايه امهاتنا كانت بتخوفنا لما كنا نعمل حاجة مش عجباهم علي سبيل المثال لو منمتش حجبلك أبو رجل مسلوخة أو ابو زبعبع أو العسكري أو امنا الغولة واكيد في بيوت كتير لسة بتستخدم الحاجات ديه مع العيال علشان تخوفهم اد كدة احنا شعب متربي علي الخوف في حد بيخاف من حاجه تسميها امه. الغولة بقت امنا دحنا شعب بنقدس الحاجات اللي بيخاف منها وخصوصا العسكري لو مسكتش حجبلك العسكري لو مكلتش حجبلك العسكري مع ان المفروض العسكري ميخوفش دا كل الناس بتشتغل وتنتج إلا هو بياخذ مرتبه من أموال الشعب يعني هو علي رأي المثل الشرطة في خدمة الشعب. حد والنبي يفسر لي مين هو ابو رجل مسلوخة واشمعني مسلوخة ليه مش مقطوعة ومين ابو زبعبع ومين اللي زبعبعه دا بدل ما نربي أولادنا علي الشجاعة بنغرس فيهم الخوف والجبن من صغرهم علشان كده قررنا أنا وأم عمر عمرنا نخوف ابننا ابدا وخصوصا من العسكري ولازم نديله ثقة في نفسه وياريت كل الناس تعمل كده علشان يطلع عندنا جيل شجاع واثق من نفسه بدل من أجيال الخوف اللي احنا منها. علي فكرة الوقت اتأخر أوي وأنا لازم أنام احسن أبو رجل مسلوخة يطلعلي تصبحوا علي خير.