خدو المناصب والكراسي بس اكلونا عيش حاف، وكفاية علينا «السترة» اكبر نعمة من المولي عز وجل، وفي النهاية الرؤوس كلها بتتساوى.. الغفير مع الوزير، ومحدش بقى أحسن من حد، ولحد دلوقتي مسمعتش عن حد خلد في الدنيا ولا خد كرسي معاه. . تصريحات سمعتها من واحد غلبان بس ملوش صوت والراجل بصراحة حملني أمانة، أقولها علي لسانه للطيبين، اللي هاجوا وماجوا وشبعوا هري، وكلام حلو وجميل، تعليقا علي التصريح الأخير للمستشار الجليل وزير العدل المستقيل. لما قال سيادته «إن ابن عامل النظافة لايصلح لتولي منصب القضاء وكتر خير ابوه اللي رباه»»الغلبان كان له رأي مختلف تماما، وقال أنا بصراحة كمصري حسيت إني طاير برفرف في السما بصوت عالي مسموع ولا مش مسموع مش دي الحكاية. بس علي قد ما أنا فرحان برضوا زعلان، طيب حد يقلي يابن الناس الغلابة انت زعلان ليه؟ والكلام علي لسان الغلبان.» أقولك يا باشا أنا زعلان من الناس الطيبين اللي بالغت قوي في الهجوم علي السيد المستشار الجليل وزير العدل السابق, لأن الراجل بصراحة مغلطش في حد، وبعدين هو اللي يقول الحق يطلع من البلد! بس هو سيادته يعني ممكن يعاتب عتاب رفيع علي إن الكلام ده يعني مش على الهوى، علشان شعور الناس الطيبين اللي زينا.. وزيكم. وقال الغلبان «الموضوع خد حجم اكبر من حجمه، دة صحيح لأنه كلنا عارفين، ومتأكدين ان ولاد الناس الغلابة هما اللي مسيطرين علي المراكز، والمناصب في أغلب قطاعات الدولة مش في مرفق القضاء بس بصراحة يعني. وقال الغلبان، طبعا الأمثلة كتير لشباب كافحوا واتعلموا بفلوس الدولة وكانوا بيذاكروا علي نور عواميد الكهرباء، زي ابن عم عوض اللي كان في «التمثيلية» بتاع «البخيل وانا» اللي برافوا علية فضل يدح في الحقوق لحد ما أتعين وكيل نيابة «اد الدنيا» . واستكمل الغلبان «انا مش هتكلم كتير في الموضوع دة علشان مضيعش وقتكم، وعاوز اختصر علي قد مقدر وأجيب من الآخر. أنا واحد من الغلابة اللي عارف إن تولي المناصب والوظائف العامة حق ذكرته جميع الدساتير، والقوانين، وسلملي عليهم كتير طبعا ده على لسان الغلبان. وبعث الغلبان رسالته للناس الطيبين «فيه مهم وفيه أهم والاهم النهاردة ناكل عيش حتى ولو حاف، والغموز ده ممكن يكون نوع من الرفاهية، مش كل الناس تستحقه ممكن يجي علي المهل.» وأعلن الغلبان تضامنه مع وزير العدل المستقيل لأن سيادته بيتكلم في واقع، وطبعا الطيبين ممكن يزعلوا مني، هما طبعا أحرار وقال تاني الغلبان أنا متنازل عن الحق في تولي المناصب العليا بالدولة المصرية وهو حر طبعا محدش يجرؤ يحجر عليه. وطلب الغلبان توفير الأمن ولقمة العيش وحيطة تقويه وهدمة تستره وان كان علي المناصب إلي زعلانين عليها الراجل بمحض إرادته قال «بيدي لا بيد وزارة العدل»، وطبعا ده مش ضعف ولا استكانة ولا يأس لا قدر الله ولكن مراعاة لطبيعة المرحلة اللي بتحدد الأولويات. وياريت محدش يزعل من الناس الطيبين علشان الغلبان يكفيه إنه يلتحف بالستر والصحة ويعرف ياكل عيش حتى حاف وده في الأول والآخر تصريحات غلبان ممكن محدش ياخد له علي كلام. «غلبان مغلوب متنازل»